4-7

"საქართველო "
# 4 (1776)
2 აპრილი, 2002 წელი

ვისი მოწყობილია ტერორისტული აქტები აფხაზეთში?!

ინტერვიუ აფხაზეთის უშიშროების მინისტრის პირველ მოადგილესთან ვიტალი მიხელიძესთან

27 მარტი ავად გათენდა აფხაზეთში. თანმიმდევრობითა და დიდი ოსტატობით განხორციელებულ ტერორისტულ აქტებს მსხვერპლი მოჰყვა, არიან დაზარალებულნიც. ხალხი პანიკაშია. პირველი, ვინც აფხაზურმა მხარემ მომხდარში დაადანაშაულა და ამხილა, ქართული მხარეა. დღეს ჩვენს საზოგადოებაშიც ვნებათაღელვაა და ერთნაირად აინტერესებს ყველას, ვისი მოწყობილია ტერორისტული აქტები აფხაზეთში? ბუნებრივია, არის შიშიც, რომ შესაძლოა მოვლენათა ჯაჭვი ავად გადაესკვნას ერთმანეთს და პროვოკაცია საომარი მოქმედებების გაგრძელების საბაბი გახდეს.

ზუსტი პასუხისაგან ძალოვანი სტრუქტურები თავს იკავებენ. ამ შემთხვევაში არც ჩემი რესპოდენტია გამონაკლისი. აფხაზეთის უშიშროების მინისტრის პირველი მოადგილე, ვიტალი მიხელიძე, თავის ინტერვიუში კატეგორიულად უარყოფს ქართული მხარის მონაწილეობას მომხდარ ტრაგედიაში.

- ბატონო ვიტალი, უკანასკნელ პერიოდში ბევრს საუბრობდნენ აფხაზეთში მოსალოდნელ პროვოკაციაზე. ფაქტია, ტრაგედია მოხდა. დღეს მთელ საზოგადოებას აინტერესებს, ვისი მოწყობილია ეს?

- აფხაზებთან მიმართებაში, იგივე რუსებთან დამოკიდებულებაში, ისეთ სიტუაციაში ვიმყოფებით, რომ აქ ნებისმიერ ქმედებას შეიძლება პოლიტიკური სარჩული დაედოს. ალბათ, იმიტომაც, რომ ეს ყველაფერი არსებული პოლიტიკის შედეგია. ჩვენს საზოგადოებაში თვითონ პროვოკაციებზე საუბარი იმდენად გახშირდა, რომ გვინდა თუ არ გვინდა, ყველა ბრუნვაში ვატრიალებთ ამ ტერმინს. პროვოკაციას აქვს გარკვეული მიზანი და ის უნდა ექვემდებარებოდეს გარკვეულ ლოგიკას. რამდენიც არ უნდა ამტკიცოს აფხაზურმა მხარემ, რომ ეს ქართველების გაკეთებულია, თუ სათანადო არგუმენტი არა აქვს, ვარაუდის დონეზე საუბარი, ამ შემთხვევაში აბსურდია. მე, როგორც უშიშროების წარმომადგენელი, გამოვრიცხავ ქართული მხარის მონაწილეობას მომხდარში. უკაცრავად და, თუ ვინმე თავქარიანმა დამოუკიდებლად (ვარაუდის დონეზე ვლაპარაკობ), ეს გააკეთა, ყოველგვარი გათვლის გარეშე, ის მტერია. ცხადია, ნებისმიერმა ქმედებამ უნდა გამოიღოს შედეგი და არა უკუქმედება.

- გარკვეულმა პოლიტიკურმა წრეებმა მომხდარი ფაქტი ამერიკელების მიერ გაწვრთნილ ქართველ სამხედროებს დაუკავშირეს. ამის შესაძლებლობა არ გამოურიცხავს აჭარის ლიდერს. თქვენი კომენტარი გვაინტერესებს.

- დღევანდელ სიტუაციაში იმის მტკიცება, რომ იქ ამერიკელების გაწვრთნილ სამხედროებს ჩაედინათ დანაშაული, ცოტა არ იყოს, უხერხულიცაა. ვითარებას ვაანალიზებ და ვამბობ, რომელი ჭკუათმყოფი ჩაატარებდა ასეთ აქციას აფხაზეთში? ხედავთ, რა რეზონანსიც მოჰყვა. აქ არ არის საუბარი ვალერი არშბას განცხადებაზე. არ ყოფილა არც ერთი უბედური შემთხვევა, რომ ჩვენი მხარისათვის არ დაებრალებინათ. გავიხსენოთ ვორონოვისა და არშბას მკვლელობა. საბოლოო ჯამში, ვორონოვის მკვლელები რომ დააპატიმრეს, აღმოჩნდა ერთი ჩეჩენი, ერთი აფხაზი და ერთი ადიღეელი. ამ შემთხვევაშიც, ნამდვილად არ არის გასაკვირი, რომ ქართველებს მიაწერენ დანაშაულს. ამერიკელების გაწვრთნილ სამხედროებზე საუბარი იმდენად უსაფუძვლოა, რომ ასეთ ნათქვამზე კომენტარის გაკეთებაც, პირადად ჩემთვის უხერხულია.

- ბატონო ვიტალი, ალბათ, დამეთანხმებით, დანაშაული იმდენად მაღალ დონეზეა შესრულებული, რომ გამორიცხულია, უბრალოდ "თავქარიანის" მოქმედებასთან გვქონდეს საქმე. სხვათა შორის, არც პარტიზანების მონაწილეობას გამორიცხავენ...

- რამდენადაც ჩვენ გვაქვს ინფორმაცია, პარტიზანები ამ ზონაში და ამ სიშორეზე დაფიქსირებულები არ არიან.

- რატომ, მათ არა აქვთ სათანადო უნარი, რომ ასეთი ტერაქტები განახორციელონ აფხაზეთის სიღრმეში?

- არა, შეღწევაზე საუბარი არა მაქვს. პარტიზანებმა თუ ოჩამჩირეში ვერ შეაღწიეს, მაშინ მათ ყველაფერზე უნდა აიღონ ხელი. მე, უბრალოდ, ვაფიქსირებ იმ ინფორმაციას, რომ იმ ზონაში, ენგურს იქით არავითარი დაჯგუფებები არ ყოფილა.

- როგორც ვიცით, აფხაზებმა საკითხი დააყენეს საერთაშორისო ორგანიზაციების წინაშე. ამ შემთხვევაში ქართულ მხარეს რა კონტრარგუმენტების წაყენება შეუძლია?

- ქართველებს, ალბათ, არ მოუხდებათ იმის მტკიცება, რომ ტერაქტები მათი ჩადენილი არ არის. ჩვენ უკვე გავაკეთეთ განცხადება - მე, როგორც სპეცსამსახურის წარმომადგენელი, ვამბობ და ამაზე პასუხსაც ვაგებ, რომ სპეცსამსახურს მომხდართან არანაირი შეხების წერტილი არ გააჩნია. რაც შეეხება მტკიცებას, ეს უკვე აფხაზურმა მხარემ უნდა დაამტკიცოს. წარმოადგინოს ფაქტები, რაღაც კონკრეტული ნივთმტკიცება, რომ დანაშაული ქართველებმა ჩაიდინეს. ბუნებრივია, ვერც დაამტკიცებენ, რადგან ჩვენს მხარეს ამ შემთხვევაში არანაირი დანაშაული არ მიუძღვის.

- ბატონო ვიტალი, როგორ შეიძლება განვითარდეს სცენარი? შეიძლება თუ არა, ვთქვათ, რომ აფხაზეთში შესაძლებელია საომარი მოქმედებების გაგრძელება?

- ვფიქრობ, რომ სიტუაცია არ გართულდება. ხვალ რაღაც უბედურება დაიწყებაო, ამის საფუძველი არ არსებობს. თავისთავად უბედურებაა ფაქტი, რომ დაიღუპა ხალხი, არიან დაზარალებულები. გამომდინარე აქედან, არ არის გამორიცხული, მიიღონ გარკვეული ზომები. მითუმეტეს, დღეს აფხაზები ღიად აცხადებენ, რომ ტერაქტები ქართული მხარის მოწყობილია, მათ უკან დგანან სპეცსამსახურები და მხარს უჭერს ხელისუფლება. იქ არის მშვიდობიანი მოსახლეობა და არ გამოვრიცხავ აქციების ჩატარების მომენტს. ფართომასშტაბიან საომარ მოქმედებებზე საუბარი არ არის. შორს ვარ იმ აზრისგან, რომ შეიძლება ომი გაჩაღდეს. დღესდღეობით დაძაბული ვითარებაა, აი, მაგალითად, 28 მარტს აფხაზურმა მხარემ უარი განაცხადა ჭუბურხინჯში ოთხმხრივ მოლაპარაკებაში მონაწილეობაზე, ენგურს გაღმა რუსებმა თავიანთი საგუშაგოები გააძლიერეს და ა.შ. შეიძლება, ეს იყოს ის შემთხვევა, როცა მინდა სასურველი რეალობად აღვიქვა.

2002

მოგვწერეთ opentext@flashmail.com