"რეზონანსი "
# 27
პარასკევი, 1 თბერვალი, 2008 წელი

ოპოზიცია აცხადებს, რომ ბურჯანაძესთან არანაირი კონსულტაციები არ ყოფილა - კაციტაძე: "სააკაშვილს სამწელიწადნახევრის განმავლობაში ვეუბნებოდით ოთახებიდან და მისი პასუხი იყო - "აჩმახებენო"

რუსიკო მაჩაიძე

პარლამენტის თავმჯდომარის განცხადებით, საზოგადოებრივი მაუწყებლობის სამეურვეო საბჭოს დაკომპლექტება შემჭიდროებულ ვადებში მოხდება. ეს არის ოპოზიციის მემორანდუმის ერთ-ერთი საკითხი და, ნინო ბურჯანაძის თქმით, ვადების შემჭიდროების შესახებ გადაწყვეტილება ოთხშაბათს გამართულ შეხვედრაზე გადაწყდა. თუმცა მემორანდუმის ავტორები აცხადებენ, რომ ასეთი შეხვედრა არ გამართულა.

ამასთან, ხელისუფლების მხრიდან კეთდება განცხადება, რომ ოპოზიციის მიერ ჩამოთვლილი საკითხებიდან ნაწილი უკვე შეთანხმებულია. რა საკითხებზე შეიძლება მოხერხდეს შეთანხმება ხელისუფლებასა და ოპოზიციას შორის და რა იქნება ოპოზიციის მთავარი მოთხოვნა - ამ საკითხებთან დაკავშირებით "რეზონანსი" "ახალი მემარჯვენეების" წარმომადგენელს, მამუკა კაციტაძეს ესაუბრა.

მამუკა კაციტაძე: დოკუმენტის ცალკეული საკითხები კონტექსტიდან ამოგლეჯილად არ უნდა განვიხილოთ. მით უმეტეს, ფორმატი არ უნდა იყოს პარლამენტის პრეზიდიუმის ტრიბუნიდან გზავნილების გაკეთება. არსებობს მაგიდის გარშემო დაჯდომის და საუბრის ფორმატი. ყველა იმ 17 საკითხზე და მათ შორის, საზაგადოებრივ მაუწყებელთან დაკავშირებითაც, საჭიროა ამ ფორმატის გამოყენება.

ამიტომ მე ვერ დავარქმევ იმას მემორანდუმთან დაკავშირებით საუბრის დაწყებას, როდესაც რაღაც განცხადებები კეთდება პარლამენტის პრეზიდიუმიდან. მით უმეტეს საზოგადოებრივ მაუწყებელთან დაკავშირებით ამ ტიპის განცხადება დაახლოებით ორი კვირის წინაც გაკეთდა და ამ ორი კვირის განმავლობაში პრაქტიკული თვალსაზრისით წინ არაფერი დაძრულა.

რაც შეეხა იმას, რომ შემჭიდროებულ ვადებში უნდა მოხდეს დაკომპლექტება, ბუნებრივია, უნდა მოხდეს, იმიტომ, რომ ჩვენ ყველაზე გვიან ოთხ თვეში ჩასატარებელი გვაქვს საპარლამენტო არჩევნები. ჩვენი მემორანდუმი ყველაფერთან ერთად ამ საპარლამენტო არჩევნებისთვის პოლიტიკური გარემოს გაუმჯობესებასაც ემსახურება. ამიტომ 31 მაისი არის ბოლო ვადა. არჩევნების ჩატარებიდან ორი თვით ადრე არჩევნები უნდა დაინიშნოს. ანუ 31 მარტს ყველა დონის ცვლილება, საკანონმდებლო იქნება, პოლიტიკური თუ სხვა, უნდა იყოს დასრულებული. ამიტომ ჩვენ ყველას ერთად გვაქვს მაქსიმუმ ორი თვე იმისათვის, რომ კონკრეტული გადაწყვეტილებები კანონთან შესაბამისობაში მოვიყვანოთ.

ბუნებრივია, საზოგადოებრივ მაუწყებელთან დაკავშირებით ვერც ბურჯანაძე და ვერც ვერავინ, ხელისუფლებაში იქნება თუ ოპოზიციაში, ამას ქულად ვერ ჩაიწერს. ყველა ვადა უნდა შემჭიდროვდეს და ეს ვინმეს ნება-სურვილზე არ არის დამოკიდებული. დიახაც, უნდა შევიწროვდეს. არ შევიწროვდება. - შევავიწროვებინებთ.

"რ": სააკაშვილმა ოთხშაბათს განაცხადა, რომ ქუჩიდან ნათქვამს ვერ გაიგებს. ამასთან უმრავლესობის მხრიდან კეთდება განცხადებები, რომ ულიტიმატუმის ფორმით საუბარი მათთვის მიუღებელია...

მ.კ: სააკაშვილის ეს განცხადება, რომ ქუჩიდან რაც უფრო ხმამაღლა დამიყვირებენ, მით ურო ცუდად გავიგებ და ოთახებიდან მითხარითო, ცოტა არ იყოს, დაუჯერებელია. სამწელიწადნახევრის განმავლობაში ვეუბნებოდით ოთახებიდან, დაწყებული საპარლამენტო დარბაზიდან, დამთავრებული კომიტეტებით, და მისი პასუხი იყო ასეთი, - "აჩმახებენო". როდესაც ხალხმა ქუჩიდან დაუყვირა, უცბად გაიგო ყველაფერი.

რეალობა სულ სხვაა. სააკაშვილს უკეთესად ესმის ქუჩიდან, ვინაიდან, როგორც შედეგებმა აჩვენა, მასზე ქუჩიდან დაძახილი უკეთესად მოქმედებს. შევხედავთ, რას მოისმენს ოთახიდან 15 თებერვლამდე და თუკი ვერ მოისმენს, მერე დავუძახებთ ქუჩიდან და შევადარებთ, რომელი უფრო კარგად მიდის მის ყურთასმენამდე.

"რ": ანუ თქვენ ულტიმატუმის ფორმის შეცვლას არ აპირებთ.

მ.კ: როგორც ჩანს, ხელისუფლებას აწყობს ამ სიტყვის გამოყენება, რომ ოპოზიცია გველაპარაკება ულტიმატუმითო. ამ დროს მე ვამბობ სრულიად ცხადად, რომ აქ ჩამოყალიბებულია კონკრეტული წინადადებები, თუ გნებავთ, მოთხოვნები კონკრეტულ საკითხებთან დაკავშირებით.

იქ სადმე წერია, თუ ამას არ იზამთ, ჩვენ ამას მოვიმოქმედებთო. ერთადერთი, რაც ვთქვით, ის იყო, რომ დავთქვით ამ საკითხებთან დაკავშირებით საუბრის დაწყებისთვის გონივრული ვადა.

ცხადია, არის საკითხები, რომელთა განხორციელება დროს მოითხოვს, მაგრამ პოზიციის დაფიქსირება ხომ შეიძლება. თუ ასე სიამოვნებთ, დაარქვან "ულტიმატუმი", მაგრამ ჩვენ ვამბობთ, რომ ეს არ არის ულტიმატუმი. ეს არის წინადადებები, რომელზეც ვითხოვთ ან "ჰოს" ან "არას" და ამაზე იქნება დამოკიდებული ჩვენი შემდეგი მოქმედება, რაშიც ვართ აბსოლუტურად თავისუფალი.

"რ": ნინო ბურჯანაძემ განაცხადა, რომ საზოგადოებრივ მაუწყებელთან დაკავშირებით გადაწყვეტილება ოთხშაბათს გამართული შეხვედრისას იქნა მიღებული. სხვა საკითხები არ განხილულა.

მ.კ: არანაირი კონსულტაცია არ ყოფილა. ჩვენთან კონსულტაციები არ ყოფილა. ყველა დონეზე გადავამოწმე. გადავამოწმე "დემოკრატიულ ფრონტში" და არც მათთან არ ყოფილა. მხოლოდ ამერიკის დემოკრატიული ინსტიტუტი შეხვდა უმრავლესობას ამ საკითხებთან დაკავშირებით და შეგვხვდა ჩვენც. თუ ამ შეხვედრებს გულისხმობდა, არ ვიცი. უშუალო კონტაქტი არ ყოფილა და ვფიქრობ, უახლოეს დღეებში იქნება, რათა გარკვეული ტენდენციები გამოიკვეთოს.

"რ": ხელისუფლების მხრიდან კეთდება განცხადება, რომ არის საკითხები, რაზეც მოლაპარაკება შეიძლება და რაზეც ხელისუფლების პოზიცია უცვლელია. თქვენთვის თუ ცნობლია, ეს რომელი საკითხებია.

მ.კ: არ ვიცი და გვაინტერესებს. ამისთვის საჭიროა შეხვედრა. ჯერ ერთი, ჩემი ინფორმაციით, მათი მხრიდან ითქვა, რომ ამ 17 საკითხი რაღაცები საჭიროებს მეტ გარკვევას. ანუ, უთქვამთ, რომ გაუგებარია ამ საკითხების მიღმა რას გულისხმობს ოპოზიციაო. ამიტომ, შეხვედრა თუნდაც იმიტომ არის საჭირო, რომ გავაგებინოთ, რას ვგულისხმობთ.

დამერწმუნეთ, როგორც მე უნდა მივიდე შეხვედრაზე და დავიცვა ჩვენი პოზიცია, რაღაცას რომ ვითხოვთ, რატომ ვითხოვთ, ასევე ძალიან მაინტერესებს, იმ საკითხებზე, რაზეც ხელისუფლება იტყვის, ამაზე არც კი ვილაპარაკებთო, რატომ არ უნდა ვილაპარაკოთ. თუ ჩემი არგუმენტი იქნება სუსტი და მე ვერ დავიცავ ჩემს პოზიციას, მაშინ ის საკითხი ამოვარდება. მაგრამ თუ დავიცავი, კეთილი ინებონ და შეასრულონ. ეს ერთი მხრივ საჭიროა იმისათვის, რომ სიმართლე დადგინდეს და, მეორე მხრივ, როგორც ქართულმა, ასევე საერთაშორისო საზოგადოებამ უნდა დაინახოს, რომ კანონდარღვევებისთვის, ზეწოლებისთვის დაისაჯა ვიღაც და არ შერჩა, რათა ეს ფსიქოლოგია არ გადავიდეს საპარლამენტო არჩევნებზე. თუ ეს გადავიდა, მაშინ მისდამი ნდობა იქნება ისეთივე ნიჰილისტური, როგორც დღეს არის. ამიტომ, ვამბობთ, რომ ეს ყველაფერი ნდობის აღდგენას სჭირდება.

"რ": რომელია ისეთი საკითხი, რომელიც ოპოზიციისთვის არის აუცილებელი, რომ დაკმაყოფილდეს.

მ.კ: გეთანხმებით, რომ არის მეტად მნიშვნელოვანი და შედარებით ნაკლებად მნიშვნელოვანი საკითხები. მაგრამ ეს 17 პუნქტი მთლიანობაში არის ერთი პაკეტი. ჩვენ ეს ჩვიდმეტი პუნქტი იმიტომ კი არ ჩამოგვიყალიბებია, რომ აქედან, ვთქვათ, 6 დავუთმოთ და 11 შევასრულებინოთ. დახლში კი არა ვართ, რომ ვივაჭროთ. ეს არის ერთიანი პაკეტი და თუკი ისინი დამიმტკიცებენ, რომ აქედან არც ერთი არ არის საჭირო, მაშინ არც ერთი არ უნდა იყოს. მაგრამ თუ დამტკიცდება, რომ ჩვიდმეტივეა საჭირო, ყველა უნდა იყოს.

"რ": რატომ შეიტანეთ მემორანდუმში ის საკითხები, რაზეც უკვე არსებობს შეთანხმება.

მ.კ: ეს ცვლილებები ინიცირებული იქნა ნოემბერში და იყო შეთანხმება, რომ დეკემბერში პირველი მოსმენით გასულიყო. მაგრამ გადაიდო. მე არანაირი გარანტია არა მაქვს იმის, რომ ეს ბოლოშიც არ გადაიდება, ან არ ტრანსფორმირდება.

მეტსაც გეტყვით, საკონსტიტუციო ცვლილება არის 11 საკითხში. მათ შორის, არის პრეზიდენტის ვადების შეზღუდვების შეცვლა. დღეს მაჭავარიანი ამბობს, რომ ეს აღარ არის აქტუალური საკითხი და არ გავა განსახილველად სესიაზე. თუ არ გავა, მაშინ ინიციატორმა გაიწვიოს. რატომ გვალაპარაკებს ამდენს. ინიციატივა კანონს არ ნიშნავს და ამ შემთხვევაში სწორედ იმიტომ შევიტანეთ ნუსხაში, მერე არ აღმოჩნდეს, რომ აქტუალური აღარ ყოფილა.

(c) გაზეთი " რეზონანსი "
(c) ქართული პრესის კომპიუტერული არქივი