"რეზონანსი "
# 37
ორშაბათი, 11 თებერვალი, 2008 წელი

"ახლები" არჩევნებს ბოიკოტს გამოუცხადებენ,

ეკა გულუა

გაერთიანებული ოპოზიცია ამოცანა #2-ის შესრულებას ანუ საპარლამენტო არჩევნების სამზადისს მაშინ შეუდგება, თუ ამოცანა #1 შესრულდება. როგორც "ახლები" აცხადებენ, ამ ეტაპისთვის ხელისუფლებას ამოცანა #1-ის არცერთი პუნქტი არ შეუსრულებია, რაც იმას ნიშნავს, რომ ისინი არჩევნებს ბოიკოტს გამოუცხადებენ. ოპოზიცია თანახმაა, გარკვეულ დათმობაზე თავადაც წავიდეს, მაგალითად, ვანო მერაბიშვილთან დაკავშირებით, თუმცა საარჩევნო მოთხოვნებისთვის ბრძოლა უკომპრომისო იქნება.

რა დათმობებზე წავა ოპოზიცია. დღის წესრიგში დგას თუ არა დავით გამყრელიძის გადარჩევის საკითხი. რატომ გაერთიანდა ოპოზიცია იძულების წესით. რას ნიშნავს ამოცანა #1 და #2. - ამ და სხვა საკითხებზე "მთელ კვირას" მემარჯვენე ოპოზიციის ერთ-ერთი ლიდერი მანანა ნაჭყებია ესაუბრა.

"მთელი კვირა": მიმდინარე კვირის ერთ-ერთი აქტუალური საკითხი "მემარჯვენე ოპოზიციაში" არსებული დაპირისპირებაა. საუბარია, რომ დაბალი რეიტინგის გამო დავით გამყრელიძეს თქვენ და მამუკა კაციტაძე თითქოს გამოეყავით, მის გადარჩევას ითხოვთ, ხოლო ფიქრია ჩიხრაძე და დავით გამყრელიძე მეორე მხარეს აღმოჩნდნენ. ოპოზიციის ერთიანობა ხომ არ ირღვევა.

მანანა ნაჭყებია: ჯერ მეც არ ვარ კარგად გარკვეული, ვის გუნდში ვარ. ეს ინფორმაციები ჟურნალისტებისგან გავიგე და რეალურად სად გამამწესეს, ვერ გეტყვით. მგონი, ზუსტად იგივე ვარიანტია, რაც დათა თუთაშხიაში. გარკვეულმა ადამიანებმა დავალება მიიღეს, მივიდნენ კოკინაშვილთან, რაღაც ინფორმაციები მიუტანონ და თუ კოკინაშვილი არ დახვდებათ, პირიქით გააკეთონ. ამ შემთხვევაში ასინეთა ვინ გამოვიდა, ვერ გეტყვით. ალბათ, უფრო ხელისუფლება. იმ სიამოვნებას, რომ ახალი მემარჯვენეების გუნდი დაიშალოს და დავით გამყრელიძე პოლიტიკიდან წავიდეს, ნამდვილად ვერ მივანიჭებთ ხელისუფლებას. არავინ დაშლილა და არავინ არსად წასულა.

"მ. კ": ფიქრობთ, რომ თქვენში არსებული დაპირისპირების შესახებ ინფორმაციები ხელისუფლებამ გაგივრცელათ.

მ.ნ. როგორ ფიქრობთ, როცა არანაირი რეალური საფუძველი არ არსებობს, სხვა რა უნდა ვიფიქროთ. როცა ჭორი პრესითა და ტელევიზიით ვრცელდება, ეს აშკარა დაკვეთაა. დაკვეთების მიმცემი კი ელექტრონული მედიისთვის ხელისუფლებაა.

"მ. კ": დავით გამყრელიძე დიდი ხანია, პოლიტიკურ არენაზე მართლაც არ გამოჩენილა...

მ.ნ. გასაგებია, მაგრამ ეს იმის საფუძველია, რომ ჭორები გაავრცელონ. ჩვენც ადამიანები ვართ, ჩვენც გვჭირდება პიროვნული პრობლემების მოგვარება და დასვენება.

"მ. კ": თქვენ "რეზონანსთან" ერთ-ერთ ინტერვიუში აღნიშნეთ, რომ არჩევნებისთვის სასურველი პარტნიორები ედპ და "მრეწველები" არიან. შესაბამისად, რამდენიმე დღის წინ ედპ-სთან კულუარული შეხვედრა გქონდათ, რომლის შესახებაც "მრეწველებმა" არაფერი იცოდნენ და განაწყენდნენ კიდეც. რა მოხდა, რაზე თანხმდებით კულუარულად ედპ-სთან.

მ. ნ: ეს არანაირი ფარული მოლაპარაკება არ იყო. უბრალოდ, ჩვენი მეგობრული ვალდებულება იყო, მათ შევხვედროდით და მემორანდუმის ირგვლივ მოლაპარაკებებთან დაკავშირებით საქმის კურსში ჩაგვეყენებინა. ამ ინფორმაციების მიწოდებას და აზრთა გაცვლას ედპ-ში დიდი წარმომადგენლობით მისვლა ნამდვილად არ სჭირდებოდა.

"მ. კ": იმ ინფორმაციის მიხედვით, რომელსაც თქვენ ხელისუფლების შემოდგებულს უწოდებთ, იქიდან გამომდინარე, რომ დავით გამყრელიძემ საპრეზიდენტო არჩევნებში მაღალი პროცენტი ვერ მიიღო, პარტია უფრო პოპულარული სახის გალიდერებაზე მუშაობს. მაგალითად, ერთ-ერთ ასეთ სახედ თქვენ მოიაზრებით...

მ. ნ. მსგავსი არაფერი ხდება. ამაზე სერიოზული კომენტარი არც ღირს. რაც შეეხება დავით გამყრელიძის 4%-ს, მიუხედავად ამისა, მას ქართულ პოლიტიკურ სივრცეში საკმაოდ მაღალი წონა აქვს. ძალიან ბევრისთვის დავით გამყრელიძის 4% სულაც არ არის იმის მიმანიშნებელი, რომ ის დაბალი რეიტინგის მქონე პოლიტიკოსია. ასე რომ, ამ პრობლემას ნამდვილად არ შევუწუხებივართ. უფრო ის გვაწუხებს, რომ ჩვენი ქვეყანა დემოკრატიული განვითარების გზას ასცდა. გაიხსენეთ, როგორი პომპეზურობით გადადგა მიხეილ სააკაშვილი პრეზიდენტობიდან, მაგრამ ის რეალურად არ გადამდგარა. ის ჩვეულებრივად გადაადგილდებოდა, როგორც პრეზიდენტი, იკეტებოდა ქუჩები, ტრასები, ყველგან ჩამწკრივებული იყო არასამთავრობო დაცვა, სნაიპერები, მან, როგორც პრეზიდენტმა, ქართველ ხალხს პირველმა მიულოცა ახალი წელი და ასე შემდეგ. სწორედ ეს ავტორიტარიზმია ქვეყნის უბედურება. მე არ მინდა, ამას შევეგუო და სწორედ ამიტომ ვარ ოპოზიციაში. ამ ბრძოლაში ჩვენ უკომპრომისო ვიქნებით და კონსტიტუციით დაშვებულ ყველა უფლებას გამოვიყენებთ. არ მინდა, ამ ბრძოლას მოვეშვა. სწორედ მსგავსი უკომპრომისობიდან გამომდინარე, ხელისუფლება ცდილობს, სხვადასხვა ჭირები შემოგვიგდოს, თითქოს ვიშლებით და ასე შემდეგ.

"მ. კ": იმავე ინფორმაციის მიხედვით, თქვენ და ედპ-ს თავმჯდომარე ბაჩუკი ქარდავამ თქვენივე წარმომავლობიდან გამომდინარე, სამეგრელოდან ხმების წამოსაღებად უნდა იმუშავოთ. ამას ხომ არ ეხებოდა თქვენი შეხვედრა.

მ.ნ. ესეც აბსურდია. მანანა ნაჭყებიას აქტიურობა არასოდეს აკლდა. არავითარი აქტივობა გამყრელიძის საწინააღმდეგოდ პარტიაში არ ხდება. ამაზე კომენტარი არც ღირს. ბუნებრივია, პრეტენზია გვაქვს, ყველა მხარეში ჩვენი კანდიდატი გვყავდეს. ამაში გასაკვირი არაფერია და ამას არც ქარდავა-ნაჭყებიას ალიანსი სჭირდება და არც სხვა ალიანსი. ალიანსების გარეშეც ყველაფერს კარგად მოვახერხებთ.

"მ. კ": ოპოზიციის გაერთიანებისთანავე ხელისუფლების წარმომადგენლები აცხადებდნენ და აცხადებენ კიდეც, რომ ეს გაერთიანება დროებითი და მოჩვენებითია, რადგან ისინი ერთმანეთს შემოეცლებიანო. ხომ არ მართლდება ეს პროგნოზი.

მ. ნ: ხელისუფლება მართალია, როცა ამბობს, რომ ასეთი გაერთიანებები დროებითია. დიახ, დროებითია. დემოკრატიულ სახელმწიფოებში მსგავსი გაერთიანებები საჭირო არ არის, რადგან საარჩევნო სისტემა, სასამართლო და მედია სივრცის მდგომარეობა, მათი სამართლებრივი თვითშეგნება იმის საფუძველს ქმნის, რომ არჩევნები მშვიდ გარემოში ჩატარდეს და არცერთ პოლიტიკურ ძალას მაქსიმალური ძალების მობილიზება და ერთად დადგომა არ სჭირდება.

საქართველოში კი არანორმალური სიტუაციაა და აქედან გამომდინარე, ოპოზიცია იძულებულია, დროებით გაერთიანდეს. ბუნებრივია, ამ გაერთიანებაში სხვადასხვა მიმართულების ძალები არიან. "რესპუბლიკელები" ლიბერალები არიან, "კონსერვატორები" - კონსერვატორები, არსებობენ მემარჯვენე იდეოლოგიის პარტიები და თუ ისინი იძულებით ცდილობენ, ერთი პოლუსი შექმნან და გაერთიანდნენ, ეს კარგი ცხოვრების შედეგი არ არის. თუმცა, ეს იმას არ ნიშნავს, რომ მუდმივად ასე იქნება. მე არც ჩემს პარტიას ვუსურვებ, ხელისუფლების სათავეში საკონსტიტუციო უმრავლესობით მოვიდეს.

"მ. კ": რატომ.

მ.ნ. როცა შენ არავის მოსმენის ვალდებულება არ გაქვს, რადგან იცი, რომ შენი ქვეშევრდომი 150 ადამიანი მხარს იმას დაუჭერს, რასაც შენ შემოიტან, ამას ქვეყანა ყოველთვის უბედურებისკენ მიჰყავს. ეს ნამდვილად არ არის საჭირო. ჩვენ უნდა გვყავდეს რამდენიმე ძლიერი პოლიტიკური სუბიექტი, რომელიც ხან ოპოზიციაში იქნება, ხან პოზიციაში. მიუხედავად იმისა, რა გამოცდილებაც სააკაშვილმა არჩევნებზე მიიღო, ის უმაღლეს საკანონმდებლო ორგანოს ისეთივე ცინიზმით ექცევა, როგორც აქამდე. პარლამენტში შემოტანილია კანონთა უზარმაზარი პაკეტი, რომელმაც ქვეყნის ეკონომიკური და საფინანსო პოლიტიკა თავდაყირა უნდა დააყენოს და მთლიანად შეცვალოს. პრემიერ-მინისტრი და ამ კანონპროექტის შემმუშავებელი კახა ბენდუქიძე საკუთარ თავს უფლებას აძლევენ, პარლამენტში საერთოდ არ მობრძანდნენ და ის საპარლამენტო მდივანს წარმოადგენინონ, რომელსაც პაკეტზე წარმოდგენაც არა აქვს.

"მ. კ": რაც შეეხება წინასაარჩევნო კოალიციას, ისევ "მრეწველებსა" და ედპ-ზე ფიქრობთ თუ სხვებზეც.

მ.ნ. სანამ ხელისუფლება არ გამოიჩენს პოლიტიკურ ნებას, რომ ქვეყანაში შეიქმნას ნორმალური საარჩევნო გარემო, სადაც შესაძლებელი იქნება ამომრჩეველთა ხმების რეალურად ქცევა, მანამ ალიანების შექმნას და არჩევნებში მონაწილეობას აზრი არა აქვს. ჩვენი ძირითადი სამუშაო ფრონტი ამ ეტაპზე მემორანდუმს უკავშირდება. ეს არის ამოცანა #1 და თუ მას შევასრულებთ, ამოცანა #2-ზე გადავალთ.

"მ. კ": თუ ამოცანა #1-ს ვერ შეასრულებთ.

მ.ნ. მაშინ, ჩავთვალოთ, რომ პოლიტიკური გაერთიანება "ახალი მემარჯვენეები" არჩევნებს ბოიკოტს გამოუცხადებენ და მიხეილ სააკაშვილის სამარცხვინო ხელისუფლების სახეს მსოფლიოს აჩვენებენ.

"მ. კ": როგორ მიდის ამოცანა #1-ს შესრულება ანუ მემორანდუმთან დაკავშირებული მოლაპარაკება.

მ.ნ. ვერ გეტყვით, რომ რაიმე გარანტია გვაქვს ამოცანა #1-ის შესრულებისა. ჯერჯერობით ხელისუფლება მხოლოდ და მხოლოდ დაპირებებს იძლევა. უნდა გამოჩნდეს კანონპროექტები, საარჩევნო კოდექსში ცვლილებები, უნდა შეიცვალოს ცესკო-ს თავმჯდომარე და ასე შემდეგ. ჩვენ შეგვეძლო, რაღაც პრაქტიკული ნაბიჯები გვენახა თუნდაც ლევან თარხნიშვილისა და საზოგადოებრივი მაუწყებლის თავმჯდომარის გადაყენების სახით. ეს ხელისუფლებას ნამდვილად შეუძლია, თუმცა, არ აკეთებს. ის მხოლოდ პოლიტიკურად თამაშობს.

"მ. კ": ოპოზიციის 17-პუნქტიან მოთხოვნაში არის საკითხები, რომლის შესრულებაზე ხელისუფლება თანახმაა, თუმცა არის ისეთი საკითხებიც, რომელიც მათთვის კატეგორიულად მიუღებელია. რომელი პუნქტების დაკმაყოფილებით იქნებით კმაყოფილი.

მ. ნ: მაგალითად, იმ საკითხებს, რომლის შესრულებასაც არ აპირებენ, მე-6 პუნქტი ანუ, ვანო მერაბიშვილის გადაყენებაა. სამწუხაროდ, ხელისუფლება ცდილობს, ყველა დაარწმუნოს, თითქოს ჩვენ ულტიმატუმის ენით ვსაუბრობთ. ეს რომ ულტიმატუმი არ არის, იმითაც დადასტურდება, რომ ჩვენ შორს ვართ იმ აზრისგან, რომ ყველა მუხლი უნდა შესრულდეს, განსაკუთრებით კი მერაბიშვილთან დაკავშირებით. მემორანდუმში მერაბიშვილის პუნქტი იმიტომ გაჩნდა, რომ საზოგადოებას და ხელისუფლებას მუდმივად შევახსენოთ მერაბიშვილი, მინისტრი, რომლის უწყების გამო ერთი ქართული ოჯახი ამოწყდა.

"მ. კ": ანუ, მერაბიშვილის გადადგომის მოთხოვნა მემორანდუმში ფიქტიურია.

მ.ნ. ეს იმას ნიშნავს, რომ ჩვენ მერაბიშვილი არასდროს დაგვავიწყდება. რაც შეეხება იმ მუხლებს, რომლებმაც უნდა შექმნან გარანტია, რომ მომავალი საპარლამენტო არჩევნები ობიექტურად ჩატარდება, ამ მუხლებთან დაკავშირებით დათმობა ნამდვილად არ იქნება. თუ ეს ნაწილი დაკმაყოფილდა და მივიღეთ გარანტია, რომ მომავალი საპარლამენტო არჩევნები საპრეზიდენტოს მსგავსი არ იქნება, ჩვენ ახირებული ხალხი არ ვართ.

"მ. კ": ეს იმას ნიშნავს, რომ დათმობაზე წახვალთ.

მ. ნ. ბუნებრივია, დათმობაზე ჩვენც წავალთ. უკან არ დავიხევთ ისეთ საკითხებზე, როგორიცაა: საარჩევნო სისტემა, ცესკო-ს დაკომპლექტება, თავისუფალი მედია სივრცე, სამართლიანი სასამართლო ანუ, იმ მუხლებზე, რომელიც საპარლამენტო არჩევნების სამართლიანად ჩატარებისთვის აუცილებელია. ამ ეტაპზე კი მემორანდუმიდან არცერთი პუნქტი არ შესრულებულა. მოლაპარაკების ვადა კი 15 თებერვალს იწურება

(c) გაზეთი " რეზონანსი "
(c) ქართული პრესის კომპიუტერული არქივი

მოგვწერეთ :opentext@flashmail.com