"რეზონანსი "
# 43
კვირა, 17 თებერვალი, 2008 წელი

შავიშვილი: სიტყვა "მკვლელობა" ისტორიაში დარჩება - პირდაპირი თუ გადატანილი მნიშვნელობით

ეკა ბასილაია

"ქართული პოლიტიკის მთავარი საკითხი ხელისუფლების ლეგიტიმურობის რწმენაა,"- მიიჩნევს კონტროლის პალატის ყოფილი თავმჯდომარე და "სახალხო ფორუმის" წევრი რევაზ შავიშვილი.

"ხუთშაბათს ბურჯანაძემ თქვა, გირგვლიანის პროცესზე ერთ-ერთ ბრალდებულს ტელეფონი რომ გადასცეს და ის ვიღაცას ესაუბრებოდა, ასეთი კადრები არ არსებობსო. ეს მთელმა საქართველ რომ ნახა და ის მაინც ეთქვა, მე არ მინახავსო," - აცხადებს შავიშვილი და მისი თქმით ხელისუფლება ასე ბევრ რამეში იტყუება.

"ბასტა": როგორც პოლიტიკურად აქტიური ფიგურა არ ჩანხართ. რატომ.

რევაზ შავიშვილი: როგორც რიგითი მონაწილე ვარ ყველა იმ აქციაზე, სადაც ჩემი ხალხი დგას. ადრეც ასე იყო და ახლაც.

"ბ": როგორ ფიქრობთ, რას მოიტანს ეს აქციები.

რ.შ: ჯერ ის ვთქვათ, აქციები რატომ დაიწყო. შედეგად კი იმას მოიტანს, რის გამოც ხდება. ვიცით, რომ ნოემბრის მოვლენების განსამუხტავად ხელისუფლებამ საპრეზიდენტო არჩევნები დანიშნა, მაგრამ მიმაჩნია, რომ სიტუაცია უფრო დაიძაბა. დღეს, საზოგადოებას არა აქვს იმის განცდა, რომ ეს ხელმისუფლება ლეგიტიმურია. მათ შორის იმ ნაწილის გარკვეულ რაოდენობასაც, რომელმაც სააკაშვილს მისცა ხმა.

"ბ": ვერ დაგეთანხმებით, რომ არ სჯერათ...

რ.შ: იმ ადამიანებს ვიცნობ, ვინც ხმა სააკაშვილს მისცა და მათ არ სჯერათ, რომ ის ხმათა უმრავლესობით მოსული პრეზიდენტია. ლეგიტიმურობის განცდა არ არის და როცა საზოგადოებას ხელისუფლების ლეგიტიმურობის არ სჯერა, ასეთი საზოგადოება არ იმართება. ამას ყველა მალე დაინახავს. ასეთ საზოგადოებაში, მაგალითად, რაიონის გამგებელს ძალიან გაუჭირდება სოფელში ხალხთან საუბარი.

"ბ": მგონია, რომ სოფლებში არ არის ასეთი პრობლემები.

რ.შ: მე კი მაქვს ინფორმაცია, რომ კი.

"ბ": მარნეულშიც, ბოლნიშიც და სამეგრელოშიც, სადაც არჩევნები ხელისუფლებამ მოიგო, პრობლემებია.

რ.შ: გაგიკვირდებათ თუ გეტყვით, რომ მარნეულშიც, ბოლნისშიც და სამეგრელოშიც წააგო ხელისუფლებამ არჩევნები. 53% დაიწერა. როგორ ფიქრობთ 3%-იანი გაყალბება არ ყოფილა. ეს ხომ ამ ხელისუფლებისთვისაც დაბალი პროცენტია.!

"ბ": ხელისუფლება საუბრობს იმაზე, რომ შემოსული ყველა საჩივარი რომ ოპოზიციისათვის სასარგებლოდ გადაწყდეს შედეგის 1%-საც ვერ შეცვლის...

რ.შ: ტყუილია. რაც საიტებზეა გამოკიდული, ის შეცვლის ყველაფერს. არაფერს ვამბობ ოქმების იმ ნაწილზე, რაც ოპოზიციას უბრალოდ არა აქვს, იმიტომ, რომ ოქმები არ მისცეს. ერთიანი ცხრიანად არის გადაკეთებული, ერთ უბანზე 800 ხმაა დაწერილი, სოფელში, სადაც სულ 4 ოჯახია და 1300 მისული ამომრჩეველია დაფიქსირებული... და, ასეთი უბნები რამოდენიმე ასეულია.

"ბ": ოპოზიციამ ბრძოლის მეორე რაუნდი საპარლამენტო არჩევნებისთვის გადაიტანა, დაიწყო მოლაპარაკებებიც, მაგრამ ვერ შედგა. რა ბერკეტი აქვს ოპოზიციას მიზნების მისაღწევად.

რ.შ: ქვეყანა არალეგიტიმურობის პირობებში არ იმართება. ერთადერთი შესაძლებლობა დიქტატურის დამყარებაა და რაღაც პერიოდში შეგიძლია ამით მართო. საქართველოში კი ეს ვერ მოხერხდება. აქ ხალხი დიქტატურას არ მიიღებს და არც ღებულობს. ეს მიტინგები, სადაც ათეული ათასი ადამიანი მოდის, საზოგადოების მხრიდან იმის ჩვენებაა, რომ ადამიანებს აქვთ პროტესტის გრძნობა. უჩვენებენ ხელისუფლებას, რომ არ შეალახვინებენ ღირსებას, და ჯერ კიდევ თავს იკავებენ.

"ბ": სანამდე იქნება თავშეკავება.

რ.შ. ხალხის დიდი ნაწილი უფრო რადიკალურია, ვიდრე ოპოზიცია. ხელისუფლება კი ფიქრობს, რომ ოპოზიცია ძაბავს სიტუაციას. ამ დაძაბულობას ვერაფერი შეცვლის, გარდა სამართლიანი არჩევნებისა.

ან, რა არის მემორანდუმში რადიკალური მოთხოვნა.! რაც იქ წერია, ხელისუფლებამ ისედაც უნდა აკეთოს. სამართლიანი, საზოგადოების მხრიდან კონტროლირებადი, გამჭირვალე არჩევნები ხელისუფლების ვალდებულებაა. თუ პოლიტიკურ ძალებს შორის კონსესუსი იქნება, მაშინ ამას და ამას გავაკეთებთო, რომ იძახიან, რათ უნდა ოპოზიციის თანხმობა იმას, რომ სამართლიანი არჩევნების ჩატარებისთვის ყველა პირობა უნდა შექმნა.! ხელისუფლება აღიარებს, რომ არჩევნებს ვაყალბებ, მაგრამ თუ შემითანხმდები რაღაცაზე, შეიძლება ნაკლებად გავაყალბოო.

"ბ": ხელისუფლება არსად არ აფიქსირებს იმას, რომ არჩევნებს აყალბებს...

რ.შ: ტონი ნახეთ. კანონმდებლობაც და სიტუაციაც ისეთია, რომ გაყალბება რეალურია და აყალბებენ კიდეც. როცა ამბობს, რომ შევთანხმდეთ იმაზე, რომ ნორმალურად ჩავატარებთ არჩევნებს, ეს ავტომატურად ნიშნავს იმას, რომ მანამდე ცუდად ვატარებდით და ყველაფერი აღიარებულია.

შეთანხმებებზეც არ ხდება წასვლა. მემორანდუმი წაიკითხეთ: საოლქო კომისიებში ისეთივე იქნება წარმომადგენლობა, როგორიც სხვა კომისიებში. ანუ, 13 წევრიდან 6 ოპოზიციას ეყოლება. ბურჯანაძემ რამოდენიმე დღის წინ თქვა, რომ ჩვენ მზად ვართ სრულ პარიტეტზე წავიდეთო და ეს პარიტეტია. ამ პარიტეტმა რაც მოიტანა საუბნო და ცენტრალურ სარჩევნო კომისიებში, ვნახეთ. ამბობენ ერთს და საზოგადორებას მეორეს სთავაზობენ.

ან, როცა მათ მიერ გამოგზავნილ მემორანდუმში წერია, ყველაფერს გამოვიძიებთ (7 ნოემბერთან დაკავშირებით), მაგრამ ეს სს პასუხისმგებლობას არ გამოიწვევსო, ეს რას ნიშნავს.

"ბ": თქვენი აზრით, ხელისუფლება ხშირად ტყუის.

რ.შ: რამდენსაც გინდათ. შარშან ამ დროს პრეზიდენტმა გვითხრა, რომ წელს ჩვენი ბიუჯეტი 6-7 მლრდ. იქნება, როცა წინა დღით 4 მლრდ-იანი ბიუჯეტი დაამტკიცეს. ჰაერში გაისროლა სიტყვა. ეს ელემენტარული ტყუილია, მსხვილ ტყუილებზე არაფერს ვამბობ. სახელმწიფო, ხელისუფლება - კარიკატურულია. ასე თამაში ვეღარ გაგრძელდება.

"ბ": დიდი ტყუილები რა იყო.

რ.შ: ის, რომ გაშმაგებული სისწრაფით მივდივარ ევროპაში, არა მარტო საგარეო პოლიტიკური ვექტორების თვალსაზრისით, არამედ - ცხოვრების დონითაც. ჩემი და უამრავი ადამიანის ცხოვრების დონე შემცირდა. თუმცა, ბობოლა ჩინოვნიკი არ ვყოფილვარ, ყოველ შეიმთხვევაში არ ამბობს ამას. სააკაშვილი იძახდა, შავიშვილი თუ კონტროლის პალატიდან წავიდა, ჩათვალეთ, რომ კორუფციამ გაიმარჯვაო. ეს მისი სიტყვებია ჩემი პირველი გადადგომის დროს.

"ბ": თქვენ როცა კონტროლის პალატის თავჯდომარე იყავით, საკმაოდ ჰყვაოდა კორუფცია...

რ.შ: ჰყვაოდა, მაგრამ მე ამას ვწერდი და ვავრცელებდი - პარლამენტში და უცხოურ ორგანიზაციებში. ამას აღიარებდა ვიღაც, მაგრამ ერთი და ორი კაცი ვერ გამოასწორებდა, ამიტომ წამოვედი. დღეს კონტროლის პალატა არ არსებობს. მითხარით კონტროლის პალატის თავმჯდომარის გვარი... ერთი სიუჟეტი მაინც გამახსენეთ კონტროლის პალატის პრეზიდიუმიდან, რაც ეს თავმჯდომარე დაინიშნა... გოგო-ბიჭებით გაავსეს იქაურობა. ჭოლაძე რომ შეამოწმებს სააკაშვილის ქმედებებს, ეს ვინმეს სჯერა.

"ბ": როგორ ფიქრობთ, კორუფცია რა დონეზეა დღეს.

რ.შ: როცა მარტო ბიზნესის ის ნაწილი ვითარდება, სადაც ხელისუფლების წარმომადგენლებს წილები აქვთ, ეს ელიტარული კორუფციაა. თანამდებობებზე დაუმსახურებლად მოსვლაც კორუფციაა.

დამისახელეთ ერთი მინისტრი ან სამმართველოს უფროსი, რომელზეც იტყვით რომ ბრძენია... პრეზიდენტის ჩათვლით.

"ბ": გია ნოდია მიჩნეულია, როგორც განათლებული და თავისი საქმის მცოდნე ადამიანი...

რ.შ: ბრძენია გია ნოდია. ბრძენი კაცი არ აკეთებს ისეთ რამეებს, რაც ნოდიამ იკადრა. მას დაავიწყდა, რომ ეგზიტპოლებს თვითონ არ ატარებდა, 800 ადამიანი მუშაობდა. ისინი კი ყვებიან, რომ მათი ეგზიტპოლების შედეგები ისეთივე იყო, როგორც უკრაინულ-პოლონურისა: 31-24 -ზე, 28%-მა პასუხი არ გასცა. არც ერთს არ უთქვამს სხვა რამ, როგორც ია ანთაძემ და კობა ლიკლიკაძემ თქვეს: ჩემს უბანზე სააკაშვილმა წააგოო.

"ბ": თქვენ პოლიტიკურ წილების არსებობაზე საუბრობდით. ოქრუაშვილმა თქვა პრეზიდენტის წილებზე, თქვენ შეგიძლიათ კონკრეტული მაგალითები თქვათ.

რ.შ: კონკრეტულად არ ვიცი. ოქრუაშვილმა რამე თქვა ისეთი, რომელზეც საზოგადოება არ საუბრობდა.! უბრალოდ, ეს უშუალოდ ხელისუფლების ერთ-ერთი მთავარი ფიგურისგან მოისმინა. ამით ფაქტის სანდოობის ხარისხმა აწია.

"ბ": მაგრამ ამას ამბობს ადამიანი, რომელსაც მილიონების გაფლანგვას ედავებიან...

რ.შ: მხოლოდ მას შემდეგ, რაც ხმა გავარდა, რომ ოპოზიციურ პარტიას ქმნიდა. ამიტომაც ვამბობთ, რომ ის პოლიტპატიმარია.

"ბ": პოლიტპატიმრების სია გახდა სწორედ ხელისუფლების ქილიკის საგანი. სიაში 13 პირი ნარკოტიკების ბრალდებით არის გასამართლებულიო...

რ.შ: ნარკოტიკებზე დაჭერაც ყოველთვის ნარკოტიკების გამო არ ხდება. მაგალითად, მცხეთის რაიონში, ერთი კვირის წინ გამოიყვანეს ჩვენი მხარდამჭერი და საკმაოდ გავლენიანი ადამიანი, 6 საათი ცდილობდნენ, რომ მას ახალი გუბერნატორისთვის დაერეკა. როცა მან ეს არ გააკეთა, ამის შემდეგ ჩაუტარეს ანალიზი და მარიხუანა აღმოუჩინეს მცირე ოდენობით. მეორე დღეს 500-ლარიანი ჯარიმა დააკისრეს ამ ასაკოვან ადამიანს, რომელიც ისეთი ავადმყოფია, რომ "ჰერკულესის" მეტს ვერაფერს ჭამს და უამრავ წამალს იღებს. მსგავსი შემთხვევის მეორედ დაფიქსირებისას დაიჭერენ, ჩვენთვის კი ის პოლიტპატიმარი იქნება.

"ბ": ოპოზიცია საუბრობს, არ დავთმობთო...

რ.შ: არავინ არ დაათმობინებს. თუ ოპოზიცია არ იქნება ადეკვატური, მას საზოგადოება გარეკავს. ოპოზიციამ იცის, რა არის საზოგადოების დაკვეთა და თუ სხვანაირად მოიქცევა, დაკარგავს ნდობას.

"ბ": ხელისუფლება საუბრობს იმაზე, რომ მოლაპარაკება ულტიმატუმებს დაემსგავსა...

რ.შ: ყველაზე მარტივად გადასაწყვეტი საკითხები რაც არის, გადაწყვიტე. ხუთშაბათს ბურჯანაძემ თქვა, გირგვლიანის პროცესზე ერთ-ერთ ბრალდებულს ტელეფონი რომ გადასცეს და ის ვიღაცას ესაუბრებოდა, ასეთი კადრები არ არსებობსო. ეს მთელმა საქართველ რომ ნახა და ის მაინც ეთქვა, მე არ მინახავსო. შენ რაც დაინახე, ილუზიააო.

"ბ": ოპოზიცია საუბრობს, რომ შეიძლება კარვებიც დადგან, ამას ხელისუფლება არ დაუშვებს, 7 ნოემბერის დარბევაც ამ სურვილმა გამოიწვია. რას ელოდებით აქციების შედეგად.

რ.შ: რას ნიშნავს არ დაუშვებს. 7 ნოემბერმა დაგვანახა, რომ საზოგადოება ამას არ შეეგუება. ხელისუფლებას წინა დღით რომ შეესრულებინა გაზაფხულზე არჩევნების დანიშვნის მოთხოვნა, ოპოზიციას საერთოდ წაართმევდა მხარდამჭერებს. ამ წუთშიც არ არიან ადეკვატურები. ჩვენი საზოგადოება ყოველდღიურად აჩვენებს იმას, რომ მათ შეუძლიათ თვითორგანიზება. მიტინგზე მისული ხალხის უმეტესობა იქ ლიდერების მოსასმენად არ მიდის, ოპოზიცია ამ შემთხვევაში მხოლოდ თარიღის დამნიშნავია.

როცა საზოგადოებაში არ არის ლეგიტიმურობის განცდა, ასეთი საზოგადოების მართვა არ შეიძლება და ყოველგვარი მიტინგების გარეშეც დაგექცევა ქვეყანა თავზე.

"ბ": რევოლუციას უნდა ველოდოთ.

რ.შ: მთავარია, რევოლუციას რას დაარქმევთ. "ვარდების რევოლუციასაც" რევოლუცია დაერქვა, რომელიც მე მიმაჩნია, რომ გარიგების შედეგი იყო.

დღეს, ხელისუფლება ვერ მართავს ბოლომდე ქვეყანას, ძალიან ცოტა ხანში კი საზოგადოება თვითონ დაიწყებს მართვას და ოპოზიციაც შექმნილი ვითარების ადეკვატური იქნება.

თუ მოვლენების განვითარების ლოგიკა იცი, შეგიძლია ისტორიას გადახედო და მიხვდები: რაც უფრო მეტს გაჯიუტდები, უარესად დაამთავრებ. არ ვამბობ, რომ როგორც ჩაუშესკუ ისე, მაგრამ - ცუდად. უკვე ზღვარზეა ყველაფერი. ქართული პოლიტიკის მთავარი საკითხი ლეგიტიმურობის საკითხია.

"ბ": პატარკაციშვილის გარდაცვალებით რაიმე თუ შეიცვლება პოლიტიკაში.

რ.შ: მგონია, რომ არაფერი არ შეიცვლება. უბრალოდ, სამწუხაროა, რომ საქართველოს ამ მასშტაბის ფიგურა აღარ ჰყავს და სამძიმარი მინდა ვუთხრა მის ოჯახს. ის ბოლო დროს პოლიტიკური პროცესების სერიოზული ფაქტორი იყო, პირველ რიგში "ტელეიმედით" და ეს ფაქტორი დღეს აღარ არის. როგორც დემოკრატიის კუნძული, მხოლოდ "კავკასია" დარჩა.

"ბ": როგორ ფიქრობთ, ეს პოლიტიკური მკვლელობაა.

რ.შ: სიტყვა "მკვლელობა" ისტორიაში დარჩება - პირდაპირი თუ გადატანილი მნიშვნელობით.

(c) გაზეთი " რეზონანსი "
(c) ქართული პრესის კომპიუტერული არქივი

მოგვწერეთ :opentext@flashmail.com