"რეზონანსი "
# 44
ორშაბათი, 18 თებერვალი, 2008 წელი

ედუარდ შევარდნაძე: "საქართველოს ასეთი ძლიერი ოპოზიცია ჯერ არ ჰყოლია" : "ბადრი კარგი კაცი იყო და პატივს მივაგებ, თუმცა ე. წ. ვარდების თუ ყვავილების რევოლუციას აფინანსებდა"

ირმა ჩაფიძე, თამთა ქარჩავა

საქართველოს ყოფილი პრეზიდენტი ედუარდ შევარდნაძე აცხადებს, რომ ბადრი პატარკაციშვილის სიკვდილი მისთვის ბურუსით მოცულია. ის თვლის, რომ რუსეთს მისი მოშორება ხელს არ აძლევდა. რას ფიქრობს ედუარდ შევარდნაძე, როცა პარლამენტის წინ შეკრებილ ოპოზიციას და მის მხარდამჭერებს ხედავს, ვის მხარეზეა თავად, რა რჩევას მისცემდა მიხეილ სააკაშვილს მოსკოვში გამგზავრების წინ და რას გრძნობს, როცა თეთრ მელას ეძახიან, ამ და სხვა საკითხებზე "მთელი კვირა" ედუარდ შევარდნაძეს ამ დღეებში ესაუბრა.

"მთელი კვირა": ბატონო ედუარდ, რას იტყვით ბადრი პატარკაციშვილის მოულოდნელ გარდაცვალებასთან დაკავშირებით. თქვენ როგორ ფიქრობთ, ეს იყო ბუნებრივი სიკვდილი თუ მას რაიმე მოუწყვეს.

ედუარდ შევარდნაძე: (დიდი ხნის პაუზის შემდეგ) ეს ჯერჯერობით ისეთივე გამოუცნობი რამ არის, როგორც ჟვანიას დაღუპვა. ერთის მხრივ, სახეზეა ბრიტანული პოლიციის დასკვნა, მაგრამ მაინც ექსპერტიზა უნდა გაგრძელდეს, როგორც ამბობენ. ბრიტანული პოლიცია ყველგან ეჭვებს გამოთქვამდა, შეიძლება რაღაცა იყოს, რაღაცას ჰქონდეს ადგილიო, პირველი ექსპერტიზის შემდეგ დაასკვნეს, რომ ეს იყო გულთან დაკავშირებული პრობლემა. ახლა რამ გამოიწვია გულთან დაკავშირებული პრობლემა. ახალგაზრდა კაცი იყო. გული არ აწუხებდა....

"მ.კ": თქვენ როგორ ფიქრობთ, რამ გამოიწვია.

ე.შ: განცდებმა, ემოციებმა, იმედგაცრუებამ, შეურაცხყოფამ, ყველაფერმა ერთად.

"მ. კ": შეურაცხყოფაში რას გულისხმობთ ბატონო ედუარდ. იმას, რაც ბოლო პერიოდში განხორციელდა მის მიმარ ხელისუფლების მხრიდან. გაგახსენებთ მის მიმართვას ხელისუფლებისადმი: "რაც გინდათ გააკეთეთ, რაც გინდათ ის წამართვით, ერთადერთი რასაც გთხოვთ, ჩემს ღირსებას ნუ შეეხებით", - განაცხადა ბადრი პატარკაციშვილმა ერთ-ერთ სატელევიზიო ინტერვიუში.

ე. შ: საკმარისი არ არის, ადამიანს რომ გული გაუსკდეს. ეს ხომ ქუჩის ჭორი არ არის, ეს ოფიციალური პირების მიერ წამოყენებული ბრალდებებია. ამას დიდი მნიშვნელობა აქვს - ბრალი წაყენებული იყო ოფიციალური პირების და არა ერთი და ორი კაცის მიერ.

"მ.კ": კონკრეტულად ვის გულისხმობთ.

ე.შ: ვინც ლაპარაკობს იცით, თქვენ კარგად. ვინც ლაპარაკობდა, ვინც ბრალს სდებდა. ვისი განკარგულებითაც ხდებოდა ყველაფერი ეს. ოპოზიცია ამას არ გააკეთებდა, იმიტომ რომ მათ ინტერესებში არ იყო ბადრის ჩამოცილება. როგორც ვიცი, ბადრი მათ ხელს უმართავდა. ე. ი. ლაპარაკი უნდა იყოს, ალბათ, ხელისუფლების მხრიდან მისი უფლებების ხელყოფაზე, შეურაცხყოფასა და ბრალდებებზე. იყო კი ყველაფერი ეს საფუძვლიანი.

"მ.კ": ბატონო ედუარდ, თქვენ როგორ ფიქრობთ, რამდენად საფუძვლიანი იყო ის ბრალდებები პატარკაციშვილის მიმართ, რომელიც ხელისუფლებამ მას წაუყენა.

ე.შ: ნუ მათქმევინებთ იმას, რისი დოკუმენტიც არ გამაჩნია. ახლა ვისი ინიციატივით იყო ეს ბრალდებები წაყენებული, ამის გარკვევა ძალიან იოლია. ეს თქვენც შეგიძლიათ, ჟურნალისტებს, დაადგინოთ, ვინ წაუყენა მას ეს ბრალდებები, ერთმა კაცმა თუ საერთოდ ხელისუფლებამ. მე ვფიქრობ, რომ ხელისუფლებამ უდავოდ უნდა აგოს პასუხი იმისთვის, რომ ადამიანი მიიყვანეს ამ მდგომარეობამდე.

"მ. კ": პოლიტიკურ პასუხისმგებლობას გულისხმობთ თუ სისხლის სამართლებრივს ამ კონკრეტულ შემთხვევაში.

ე.შ: ერთსაც და მეორესაც. ამჯერად პოლიტიკურს, რის შედეგადაც მოხდა მისი დაღუპვა. ჯანმრთელი კაცი იყო. მრავალჯერ შევხვედრივარ, მისაუბრია მასთან და ძალიან ნიჭიერი იყო.

"მ.კ": თქვენი პრეზიდენტობის დროს თუ ჰქონდა პატარკაციშვილს პოლიტიკური ამბიციები.

ე.შ: ყოველ შემთხვევაში, ჩემთან არ გამოუხატავს. ჩვენ საკმაოდ ახლო ურთიერთობა გვქონდა. ჩემი ინიციატივით ჩამოვიყვანე. არც რუსეთის პრეზეიდენტისთვის დამიმალავს, თქვენს ერთ-ერთ ძებნილს მივეცით თავშესაფარი-მეთქი. პუტინმა გაოცებულმა მკითხა, ბერეზოვსკისო. არა პატარკაციშვილს-მეთქი. მან მითხრა, ბადრი კარგი კაციაო. არ ჰქონდა მასთან ცუდი დამოკიდებულება. მაგალითიც მომიყვანა, ჟურნალისტებს ვხვდებოდით 15-20 კაციო, მაგიდასთან ორი ადგილი იყო თავისუფალიო, შემოვიდა ბერეზოვსკი და არავინ არ განძრეულა, ჩვეულებრივად დაჯდაო. შემდეგ შემოვიდა პატარკაციშვილი, ყველანი წამოცვივდნენ ფეხზე, მიესალმნენ და მიუთითეს სკამისკენო. ჟურნალისტებიც კი ამ პიროვნებას დიდად აფასებდნენ და მისი სჯეროდათო.

"მ.კ": თქვენი აზრით, პატარკაციშვილის გარდაცვალების საქმე იქნება თუ არა ისეთივე ბურუსით მოცული, როგორც ზურაბ ჟვანიასი.

ე.შ: საჭიროა ძალიან კვალიფიციური გამოძიება, რომ დადგინდეს სიმართლე. საერთაშორისო მასშტაბის გამომძიებლებმა უნდა მიიღონ გადაწყვეტილება და დადონ დოკუმენტი, რამ გამოიწვია მისი გარდაცვალება. თუ გვინდა, რომ სიმართლე დავადგინოთ, მარტო ერთი ქვეყნის გამოძიებას ვერ ვენდობით. სიმართლის გარკვევაში მთავრობა უნდა იყოს დაინტერესებული. მაგრამ არის კი დაინტერესებული.

"მ.კ": თქვენ როგორ ფიქრობთ, საქართველოს ხელისუფლება არის დაინტერესებული სიმართლის გამოაშკარავებით.

ე.შ: ვერ გეტყვით. თუ ყველაფერს გავითვალისწინებთ, რაც ბადრისთან დაკავშირებით მოხდა, ფაქტია, რომ ობიქტური არ იქნება. ხელისუფლება თვითონ არაა მართალი ამ პიროვნების მიმართ. რომელი გადატრიალების მომწყობი იყო ბადრი პატარკაციშვილი. ან რაში სჭირდებოდა. სხვათა შორის, როდესაც მე გადავდექი, მაშინ მქონდა ორი გზა, ჯარი გამომეყვანა და სისხლი დამეღვარა, მაგრამ მე ავირჩიე მეორე გზა და გადავდექი. პატარკაციშვილი იყო მათი მთავარი და ყველაზე საშიში კონკურენტი. არჩევნების დღესაც საქართველოში არ ყოფილა. აქ რომ ყოფილიყო, მიუხედავად გაყალბებისა, გაცილებით მეტ ხმას მიიღებდა. ხალხს უყვარდა და სჯეროდათ მისი. უამრავ გაჭირვებულ ადამიანს დაეხმარა. ძალიან საინტერესო საპრეზიდენტო პროგრამა ჰქონდა. მე განსაკუთრებით გამოვყოფდი დემოგრაფიული პრობლემის მოგვარებას.

"მ.კ": თქვენი აზრით, მისცემს ხელისუფლება ოჯახის წევრებს ნებართვას, საქართველოში ჩამოასვენონ.

ე.შ: არა მგონია, ამაზე ხელისუფლებამ უარი თქვას. ყოველ შემთხვევაში, მათ სასარგებლოდ ასეთი გადაწყვეტილება არ იმუშავებს. თვითონ პრეზიდენტმაც განაცხადა, მართალია, შეთქმულების მოთავე იყო, მაგრამ ყოველი ადამიანის დაკარგვა ცოდვააო. მისი საქართველოში ჩამოსვენებამდე უნდა მოეხსნას მის ქონებას ყადაღა. თვითონ ყადაღა არის უკანონო. ყადაღა დაადეს იმიტომ, რომ შური იძიეს და ჩამოიცილეს ერთ-ერთი მთავარი მეტოქე. უნდა აღსდგეს ტელეკომპანია "იმედიც".

"მ.კ": თავდაცვის ყოფილმა მინისტრმა ირაკლი ოქრუაშვილმა რუსეთის პირველ არხთან ინტერვიუში განაცხადა, 2005 წელს მიხეილ სააკაშვილმა პირადად დამავალა ბადრი პატარკაციშვილის ლიკვიდაციაო. უნდა აღიძრას თუ არა ამ განცხადების საფუძველზე სისხლის სამართლის საქმე.

ე.შ: ეს რომ გამოიძიონ, ამისათვის პირველ რიგში ოქრუაშვილი უნდა დაბრუნდეს თავის სამშობლოში. არც ის არის მთლად ანგელოზი. მასაც ბევრი დანაშაული აქვს ჩადენილი. ის არის მოწმე და თუ საჭირო იქნება, უნდა ჩამოვიდეს. თუმცა უნდა ჰქონდეს გარანტია, რომ მას ხელს არ ახლებენ. დარწმუნებული ვარ, რომ ასეთ მოწმეს არ გაახარებენ. მან ყველაფერი უნდა აწონ-დაწონოს და იმის მიხედვით მიიღოს გადაწყვეტილება. ყველაფერი უნდა იქნეს გამოძიებული, სხვანაირად განმეორდება ჟვანიას ისტორია.

"მ.კ": ჟვანიას ისტორიაში რას გულისხმობთ.

ე.შ: იმას, რომ მისი მკვლელობა თუ დაღუპვა საიდუმლოებით არის მოცული. მე თავიდან მჯეროდა, რომ გაზით გაიგუდა. მაგრამ ექსპერტებმა ეს არ დაადასტურეს. დღესაც გაურკვეველია, რა მოუვიდა. მოკლეს. მოწამლეს. მოვა დრო და ყველაფერი გაირკვევა. ისევე როგორც ბადრი, ასევე ზურაც ძალიან განათლებული და ნიჭიერი პოლიტიკოსი იყო, შეიძლება ეს ვიღაცას ხელს არ აძლევდა. ფაქტია, რომ ის მოიცილეს.

"მ.კ": უცხოურმა მედიამ გაავრცელა ჩეჩნეთის მოქალაქისა და შსს-ს თანამშრომლის, გია დგებუაძის საუბარი, რომელიც უკვეთავენ მას ბიზნესმენ პატარკაციშვილის მკვლელობას. ამის შემდეგ პატარკაციშვილმა გააკეთა განცხადება, რომ მას ემუქრება საფრთხე ხელისუფლების მხრიდან. როგორ ფიქრობთ, რატომ არ დაიწყო დგებუაძის წინააღმდეგ გამოძიება.

ე. შ: უნდა დაეწყო გამოძიება. მაგრამ რატომ არ დაიწყო, ამას ვერ გეტყვით. მე რომ პროკურორის ადგილას ვყოფილვიყავი, ეს საუბარი საკმარისი იქნებოდა იმისთვის, რომ საქმე აღმეძრა და დამეწყო გამოძიება. ეს შეუძლია ხელისუფლებას. სასამართლოში რომ გაიგზავნოს საქმე, მაშინ უნდა გამოიძიო. სასამართლოც არ ვიცი, რამდენად სანდოა. მე რომ პრეზიდენტი ვიყავი, მოსამართლეს ჯერ ვხვდებოდი, ვესაუბრებოდი და ამის შემდეგ ხდებოდა მისი დანიშვნა მოსამართლედ.

"მ.კ": ანალოგიურად ხდება დღესაც...

ე.შ: ჩემსა და სააკაშვილს შორის რაღაცა განსხვავება არის. ის კაცი კანონით თუ უკანონოდ არჩეული პრეზიდენტია და მას აქვს ძალაუფლება. საჭიროა იმ ბრალდებების დამტკიცება, რომელსაც მას უყენებენ. ეს უნდა დაამტკიცონ. ამისთვის საჭიროა ჟურნალისტური გამოძიება. თქვენ არავინ შეგიკრავთ ხელს, რომ აწარმოოთ ჟურნალისტური გამოძიება და ყველაფერი დაადგინოთ. ცოტა იყო ასეთი ფაქტები. რასაც ვერ ადგენს გამოძიება, იმას ძალიან ხშირად ადგენს ჟურნალისტური გამოძიება.

"მ.კ": გეთანხმებით. ჟურნალისტური გამოძიების საშუალებით "რეზონანსის" მთავარი რედაქტორის მოადგილემ ელისო ჩაფიძემ, თქვენი პრეზიდენტობის პერიოდში გამოააშკარავა "დინამოს" გაყიდვის ფაქტი, რომ ჩალის ფასად შეიძინა "დინამო" შს ყოფილმა მინისტრმა კახა თარგამაძემ, რომელმაც მას სასამართლოში უჩივლა. თუმცა თარგამაძემ ეს პროცესი წააგო. ამ ყველაფრის მიუხედავად თარგამაძე არ გაგითავისუფლებიათ...

ე.შ: რაზეა ლაპარაკი.

"მ.კ": "დინამოს" გაყიდვის ფაქტზე.

ე.შ: მე გავყიდე. არ მახსოვს ასეთი რამე. როცა შს მინისტრი ვიყავი, მაშინ ვიყავი "დინამოს" საბჭოს თავმჯდომარე. "დინამოს" გუნდი ისე მემორჩილებოდა, როგორც ჩემი თანამშრომლები. არ ვიცი, კახა თარგამაძე არის ის კაცი, რომელიც გუნდს გაყიდდა. წადით და გამოკითხეთ ის კაცი. საქართველო დატოვა და წავიდა. თუ არ ვცდები, რუსეთშია. ის არც მოღალატე იყო და არც ბოროტმოქმედი. თუ ვინმეს ვენდობოდი, ეს იყო კახა თარგამაძე. თუმცა სამი ტერაქტი მოხდა მის დროს. ძალიან იოლად ცოდვა არ უნდა დაიდო ადამიანმა თავზე. მე თქვენც გგულისხმობთ და ყველა იმ ჟურნალისტს, რომელიც სხვადასხა ვერსიას ავრცელებს.

"მ.კ": გამოითქვა ასეთი მოსაზრებაც, რომ პატარკაციშვილის მკვლელობა რუსეთს აძლევდა ხელს. არის ვერსია, რომ შესაძლოა, ბერეზოვსკიმ მოიცილა პატარკაციშვილი. თქვენი აზრი...

ე.შ: ჩემი აზრით, რუსეთის როლი ამ საქმეში გამორიცხულია, მაგრამ ბერეზოვსკის პირველი განცხადება გარკვეულ ეჭვებს ბადებს. ის დანამდვილებით ამტკიცებდა, რომ გარდაცვალების მიზეზი გული იყო. რატომ იჩქარა ამ დასკვნის გაკეთება. ბერეზოვსკი მისი მეგობარი კი იყო, მაგრამ არ უნდა ეჩქარა. ამ შემთხვევაში შეიძლება რაღაცა საეჭვო იყოს. თუმცა მეგობრები იყვნენ და არ გაწირავდა. ბადრის დიდი ხანია, ვიცნობ, თუმცა ვერ ვიტყვი, რომ ყოველთვის ჩემი მომხრე იყო. ამბობენ, რომ ის ვარდების თუ ყვავილების რევოლუცია, მან დააფინანსა. არადა, მე ჩამოვიყვანე, გადავარჩინე.

"მ.კ": იმიტომ ხომ არა, რომ თავის დროზე თქვენ მას აუკრძალეთ ქართულ პოლიტიკაში მოსვლა.

ე.შ: არა. თუმცა ისე მაქვს ნათქვამი, რომ მის ადგილზე პოლიტიკაში არ წავიდოდი-მეთქი. ეს ვთქვი მას შემდეგ, რაც შევამჩნიე, რომ მას პოლიტიკური ამბიციები ჰქონდა. მაგრამ ამავე დროს ორი წლის წინათ ვთქვი, ჩემი საქმე რომ იყოს, ბადრი პატარკაციშვილს პრემიერ-მინისტრად დავნიშნავდი მეთქი. ის იქნებოდა შესანიშნავი პრემიერ-მინისტრი. მთელი ამ სიტუაციიდან გამომდინარე, მე ვთვლი, რომ მას საპრეზიდენტო არჩევნებში კენჭი არ უნდა ეყარა. არც იმ იდეას ვეთანხმები, რომ მოუწოდებენ საქართველო პრეზიდენტის გარეშეო. თუმცა არის ქვეყნები, სადაც მეფეებიც კი არიან.

"მ.კ": სააკაშვილმა თქვა, ჩემი დიდი ბაბუა მეფის შთამომავალი იყოო...

ე.შ: ბაბუამისი მეფე კი არ ყოფილა. სააკაშვილი კი არ იყო, სხვა გვარი იყო.

"მ.კ": წერეთელი...

ე.შ: შეიძლება დედის მხრიდან იყო წერეთელი. ამას მნიშვნელობა არა აქვს. ბევრი პოლიტიკოსი მართლაც ბევრ ბინძურ საქმეს აკეთებს. სამწუხაროდ, ესენი მართლაც ჩემი გაზრდილები იყვნენ და ბოლოს მიღალატეს, ბევრმა მიღალატა.

"მ.კ": "ვარდების რევოლუციის" წინა დღეებში საქართველოში საგანგებოდ ჩამოსულმა იგორ ივანოვმა შემოგთავაზათ, რომ პრემიერ-მინისტრად დაგენიშნათ ზურაბ ჟვანია და პარლამენტში უმრავლესობით მოგეყვანათ სააკაშვილი. ასეთ შემთხვევაში მოვლენები, ალბათ, სხვაგვარად განვითარდებოდა. რამდენად ადასტურებთ ამ ინფორმაციას.

ე.შ: ასეთი რამ არ უთქვამს მას. ის პირველად მივიდა ოპოზიციასთან და მერე მოვიდა ჩემთან. არავითარი შემოთავაზება არ ყოფილა მისი მხრიდან. თვითონ ოპოზიციასთან მან რაიმე შეთანხმებას ვერ მიაღწია. ჩემთან მოვიდა, ნახევარი საათი ვისაუბრეთ და მერე მთხოვა, თუ შეიძლება, თვითმფრინავი მათხოვეთ, ბათუმში უნდა ჩავფრინდე და მერე მოსკოვშიო. მეც გავეცი განკარგულება, შეხვდა აბაშიძეს და მერე წავიდა მოსკოვში. ამის მერე მე ის არ მინახავს.

"მ.კ": გრძნობთ თუ არა პასუხისმგებლობას იმაზე, რაც დღეს საქართველოში ხდება. გამომდინარე იქიდან, რომ თქვენ შეუწყვეთ ხელი სააკაშვილის გაპრეზიდენტებას...

ე.შ: არა, არა. პაუსხისმგებლობას მაშინ ვიგრძნობდი, თუ სისხლისღვრაზე წავიდოდი. ესენი რომ შემოიჭრნენ პარლამენტში, რატომ დაარქვით ამას "ვარდების რევოლუცია". იქ ყველაფერი იყო, ავტომატი, ჯოხები, ტყვია და ა.შ. გარდა ვარდებისა.

"მ.კ": მიხეილ სააკაშვილს ეჭირა ვარდი...

ე.შ: არ ვიცი, არ შემინიშნავს.

"მ.კ": როდესაც ამდენ ხალხს უყურებთ ქუჩაში გამოსულს, რას ფიქრობთ.

ე.შ: ერთის მხრივ ძალიან მეშინია. ყოველთვის შეიძლება, არ იყოს მართვადი მასა, მეორეს მხრივ ძალიან მიხარია, რომ საქართველოში არის ასეთი ძლიერი ოპოზიცია. ძლიერი ოპოზიცია არის იმის გარანტი, რომ იქნება დემოკრატია. თუ დემოკრატია იქნება, არჩევნები ნორმალურად ჩატარდება. მაგრამ ამას ვიღაცამ ხომ უნდა ადევნოს თვალ-ყური. ისევ ხალხმა უნდა იხსნას საქართველო.

"მ.კ": თქვენ აზრით, საპარლამენტო არჩევნებში ოპოზიცია ერთიანი სიით უნდა გამოვიდეს თუ ცალ-ცალკე.

ე.შ: მე მგონია, რომ მაინც ერთიანი სიით აჯობებს. სხვა შემთხვევაში დაიწყება ერთმანეთს შორის კინკლაობა და შეიძლება, ერთიანი ოპოზიცია აღარ იყოს.

"მ.კ": ოპოზიციის ლიდერებიდან ყველაზე მეტად ვის გამოარჩევდით. თქვენი აზრით, რომელი შეძლებს ქვეყნის მართვას.

ე.შ: მე მგონია, რომ ეს უკვე განსაზღვრეს. ლევან გაჩეჩილაძე აღიარებული ლიდერია. როგორც ვიცი, იგი არაა უჭკუო კაცი. მართალი და წესიერი კაცია. მაგისთვის ხმები რომ არ მოეპარათ, შეიძლება პრეზიდენტიც გამხდარიყო. სხვათა შორის, საარჩევნო უბანზე რომ მივედი, მაშინვე ვთქვი, მეორე ტური, ალბათ, გარდაუვალი იქნება-თქო. მეორე ტურზე სააკაშვილი რომ წასულიყო, დარწმუნებული ვარ, რომ მისი ავტორიტეტი ამაღლდებოდა. მეორე ტურში ამდენი გაყალბება არ იქნებოდა. შეიძლება, სააკაშვილსაც გაემარჯვა, მაგრამ ეს იქნებოდა სამართლიანი გამარჯვება.

"მ.კ": ბატონო ედუარდ, თქვენ ვის უჭერთ მხარს, ოპოზიციას თუ ხელისუფლებას.

ე.შ: მე ვარ სიმართლის მხარეს. ყოველთვის ხალხის მხარეს ვიყავი და ვიქნები მანამ, სანამ ვიცოცხლებ.

"მ.კ": თქვენი აზრით, სად უნდა დასაფლავდეს პატარკაციშვილი.

ე.შ: ზვიად გამსახურდიას დასაფლავების შემდეგ მთაწმინდა დახურეს. სამწუხაროდ, ეს ჩემი გადასაწყვეტი არაა. ბადრი პატარკაციშვილი იმდენად დიდი კაცი იყო, მარტო მისი პროგრამის გულისთვის მე მას ყველაზე საპატიო ადგილას დავკრძალავდი, ეს იქნებოდა მთაწმინდა თუ დიდუბის პანთეონი. მე მივალ პანაშვიდზეც და დაკრძალვაზეც. ის ჩემთვის ახლობელი კაცი იყო. რაღაცა ამაგი მაქვს მის მიმართ.

"მ.კ": თქვენი აზრით, ბადრი პატარკაციშვილის სიკვდილმა შეიძლება დესტაბილიზაცია გამოიწვიოს საქართველოში.

ე.შ: მე თქვენ გითხარით, რომ ასეთი ოპოზიცია საქართველოში ჯერ არ ყოფილა. დღეს საქართველოში არის ძალიან ძლიერი ოპოზიცია. თუ ვილაპარაკებთ ლიდერებზე, გაჩეჩილაძე ძალიან ჭკვიანი და გონიერი კაცია. ასეა "მემარჯვენეების" ლიდერი დავით გამყრელიძეც. იგი ძალიან გონიერი კაცია. ორთავეს დიდი ხანია, ვიცნობ. გამყრელიძეს ჩემს დროს პატარა ბიზნესი ჰქონდა, ორი-სამი წლის განმავლობაში არ ვბეგრავდით. მერე, რომ გამდიდრდა, ჩვეულებრივად იხდიდა ფულს. სხვებიც, ოპოზიციაში ძალიან კარგი ადამიანები არიან.

"მ.კ": როგორია თქვენი აზრი ოპოზიციის და ხელისუფლების მემორანდუმთან დაკავშირებით. რას ურჩევდით მათ, როგორ უნდა მოაგვარონ ეს პრობლემები.

ე. შ: მე დეტალურად ამ პუნქტებს არ ვიცნობ და, სიმართლე გითხრათ, დიდად არც მაინტერესებს. ხელისუფლება ისეთ რამეს არ დათმობს, რაც ხელისუფლების ტოლფასი იქნება. მათ უნდათ, ძალაუფლება ბოლომდე შეინარჩუნონ. ჩემი აზრით, ოპოზიციამ ცოტა იჩქარა, როდესაც გამოაცხადა, მოლაპარაკებას აზრი არა აქვსო. ცოტა დრო უნდა გაეწელათ და ამ პერიოდში მოახლოვდებოდა არჩევნები და შემდეგ მათი საქმიანობის ძირითადი მოტივი იქნებოდა საპარლამენტო არჩევნებში მონაწილეობა. თუ არ ტრიალებ პოლიტიკის შუაგულში, ძალიან ძნელია ანალიზის გაკეთება. მე ახლა გარედან მაყურებელი ვარ.

"მ.კ": ოპოზიცია ამბობს, მომავალი პარასკევიდან თბილისი გადაიქცევა კარვების ქალაქადო. თქვენი აზრით, რა არის გამოსავალი.

ე. შ: არის კი კარვების ქალაქი საჭირო. მე მგონია, რომ ცოტა ნაჩქარევია ეს ყველაფერი. კარვები და თბილისი შეუთავსებელია ერთმანეთთან. თუ ასეთ რადიკალურ ღონისძიებაზე მიდიხარ, მაშინ ცოტა უნდა მოითმინო, მოახლოვდება არჩევნები და მაშინ მთელი ძალების მობილიზაცია უნდა მოახერხო. კარვებს რომ გამართავ, ვინ დაჯდება იმ კარავში. ან შიმშილობა რას მოგიტანს. ბურჯანაძის ქალმა გამოაცხადა, საზოგადოებრივ მაუწყებლის საკითხზე ჩვენ შეთანხმებულები ვართო. თუმცა რაზე არიან შეთანხმებული, ეს არ გამოაცხადეს. ხალხს ის უნდა დაანახო, რომ არ ასრულებენ არაფერს და მაშინ ხალხი გამოგყვება.

"მ.კ": გამოსულია ხალხი ქუჩაში...

ე.შ: მაშინ იყო 200 ათასი და ახლა იყო 10-15 ათასი. ხალხიც იღლება. თუ ისინი იშიმშილებენ, თქვენ გგონიათ, რომ მთავრობა თავს მოიკლავს. არა. აქ სხვა არგუმენტებს წამოაყენებენ. იტყვიან, ოპოზიციას უნდა, შიმშილობის აქციით თავიანთი გადაწყვეტილება მოგვახვიონ თავსო. ოპოზიციის წინააღმდეგი არა ვარ, ძალინ მიყვარს ეს ბიჭები. ძალიან ბევრი სამუშაოს ეძებს. დაბალი პენსიები და ხელფასებია. გაზის და შუქის გადასახადი ყოველდღე იზრდება. ამ დღეებში მომივიდა 2500 ლარი შუქის გადასახადი. რას ვწვავ ამდენს მე. როცა თქვენ, ჟურნალისტები მოდიხართ, მაშინ ვანთებ ამ ნათურებს. სხვა დღეებში ერთ-ორ ნათურას ავანთებ და ეგ არის. გაზზე უფრო მეტია გადასახადი. მე როგორმე გადავიხდი, სხვებმა რა ჰქნან.

"მ.კ": რამდენიმე დღეში მიხეილ სააკაშვილი უნდა შეხვდეს ვლადიმერ პუტინს. რა უნდა მოითხოვს სააკაშვილმა. თქვენ მის ადგილას რის მიღწევას ეცდებოდით.

ე.შ: მე რომ მის ადგილას ვიყო, პირველ რიგში, გავაკეთებდი იმას, რომ მოსკოვთან ურთიერთობას ამ შემთხვევაში არ დავძაბავდი. ყველა ზომებს მივიღებდი იმისთვის, რომ მოსკოვის ბაზარზე შეგვეტანა ხარისხიანი ღვინო, ხილი, ციტრუსები, ჩაი და ა.შ. ჩვენ არ ვართ მთლად მართალი მოსკოვის წინაშე, ისევე როგორც, არც ისინი არ არიან ჩვენს წინაშე მართალი. რუსეთის ბაზარი ძირითადი ბაზარია საქართველოსათვის. მთავარი დანაშაული საქართველოსი ისაა, რომ უხარისხო და ფალსიფიცირებული ღვინო არ უნდა შეეტანათ. ამის შემდეგ ძალიან დიდი დანაშაული ჩაიდინა რუსეთმა. რა დააშავა იმ 1500 კაცმა, მოსკოვიდან რომ გამორეკეს. ეს არ უნდა გაეკეთებინათ. ამ თემებზე უნდა ილაპარაკონ. ასევე კონფლიქტურ რეგიონებზე. ზოგი თვლის, რომ კოსოვოს შემდეგ აფხაზეთის პრობლემა ძალიან ცუდად დატრიალდება. მე მგონია, რომ კოსოვოს შემდეგ საქართველოს უფრო მეტი აქვს სალაპარაკო რუსეთთან, ვიდრე რუსეთს ჩვენთან.

"მ.კ": რუსეთი რატომაა კოსოვოს დამოუკიდებლობის აღიარების წინააღმდეგი.

ე.შ: იმიტომ, რომ კოსოვო თავისი პრობლემებით ძალიან გავს რუსეთში არსებულ პრობლემებს. ჩეჩნეთში 4 მლნ კაცი ცხოვრობს, არ შეუძლიათ, მოითხოვონ დამოუკიდებლობა. თუმცა მოითხოვა კიდეც პრეზიდენტმა დუდაევმა. მე რა უნდა ვილაპარაკო ჩეჩნეთზე მას შემდეგ, რაც ამდენი უბედურება ჩაიდინეს ჩეჩნებმა აფხაზეთში: ხალხს ხვრეტდნენ, თავებს ჭრიდნენ და ბურთს თამაშობდნენ... მაშინ მე შევუთვალე რუსეთს, ეს ბუმერანგივით დაგიბრუნდებათ-მეთქი. მართლა ასეც მოხდა. სხვათაშორის, მაშინ ელცინმა თქვა, ეტოტ ბელიი ლის აპიატ აკაზალქსჭ პრავ". ეს მისი მოგონილი სახელია. მე საზღვარგარეთ გვარით მომმართავდნენ "შევის" მეძახდნენ.

"მ.კ": თეთრ მელას საქართველოშიც ხშირად გეძახდნენ. იგივე ხდება დღესაც თქვენს სახლთან. როგორი განცდა გაქვთ ამ დროს.

ე.შ: არავითარი. ჩემს კაბინეტში არ ისმის არაფერი და არც მაქვს იმის სურვილი, რომ მოვუსმინო. უბრალოდ, მეცოდებიან. ზოგიერთი შეიძლება ავადმყოფია, ზოგიერთი შეიძლება, ჯანმრთელიცაა. რაღა დროს ამაზე ლაპარაკია.

"მ.კ": საპარლამენტო არჩევნებში უმრავლესობის სიის პირველი ნომერი ნინო ბურჯანაძე იქნება. თქვენი აზრით, არის თუ არა ბურჯანაძე დამოუკიდებელი პოლიტიკოსი და როგორ შეაფასებთ მას, როგორც პოლიტიკოსს.

ე.შ: ჩემთან დაკავშირებით ნინომ ძალიან ბევრი შეცდომა დაუშვა. როგორც სხვები, ისიც მე მოვიყვანე პოლიტიკაში. იყო კომისიის ხელმძღვანელი და საკმაოდ კარგად მოაზროვნე ქალბატონის შთაბეჭდილებას ტოვებდა. მერე წავიდა და წავიდა. როდესაც პარლამენტის წინ შეიკრიბნენ ახალგაზრდები, მე მივედი იქ მათთან დასალაპარაკებლად. მაგრამ ვერ დაველაპარაკე. ნავარჯიშევი იყვნენ, იქ იყო ნინო ბურჯანაძეც. ისინი ყვირიან გადადექის, არაფერი არ მათქმევინეს, ნინო ჩუმად არის. მერე გავრცელდა ხმა, პარლამენტში ათევდა ღამეს, რომ ეს ბავშვები არ დაშლილიყვნენ. ჩემს მიმართ ასეთი რაღაცა არ უნდა გაეკეთებინა. მე მის ადგილას ამ ბავშვებს ვეტყოდი, ბავშვებო, მოუსმინეთ შევარდნაძესო. რაც შეეხება იმას, რომ სიის პირველი ნომერი იქნება, ალბათ, რაღაცა ტაქტიკური მოსაზრება აქვს. სააკაშვილის პიროვნება მაინც დაკავშირებულია ხმების გაყალბებასთან, რასაც ბურჯანაძეზე ვერ იტყვი. შეიძლება ამიტომაც მოხდა.

"მ.კ": როგორც საქართველოს მოქალაქე, ედუარდ შევარდნაძე, რას ურჩევდით დაპირისპირებულ მხარეებს.

ე. შ: ხელისუფლებას ვერ გეტყვით, რას ვურჩევდი. მაგრამ ოპოზიციას ვეტყოდი, რომ ძალიან ნუ იჩქარებენ. რახან მოხდა ისე, რომ საპრეზიდენტო არჩევნები ავად თუ კარგად ჩატარდა და სააკაშვილი მსოფლიომ აღიარა, როგორც პრეზიდენტი, ოპოზიციას ვურჩევდი, რომ მოძრაობა არჩევნების მოახლოებისთანავე დაიწყოს. ხალხი იღლება.

"მ.კ": ოპოზიციის ლიდერები ამბობენ, ანალოგიური რამ ხდებოდა შევარდნაძის პრეზიდენტობის პერიოდშიცო. იგივე ყარყარაშვილზე განხორციელებულ თავდასხმას თქვენთან აკავშირებდნენ. რას იტყვით ამასთან დაკავშირებით.

ე.შ: თუ სიტყვის მასალა უნდათ, მოვიდნენ ჩემთან და მე თვითონ ვეტყვი, რა ცოდვები და შეცდომები იყო ჩემს დროს დაშვებული. მკვლელობა ყველა ეპოქაში იყო. სტალინს რომ რეჟიმი ჰქონდა, ისეთი რეჟიმი ბევრ ქვეყანას არ ჰქონია, მაგრამ მაშინაც იყო მკვლელობები. ჩემს დროსაც მოხდა. მაგრამ, ჟვანია ჩემს დროს მოკლეს. ჩემს დროს ბევრი რამ ხდებოდა, კარგიც და ცუდიც. მკვლელობებიც იყო. ბევრი გახსნილია, ბევრი გაუხსნელია. პაატა დათუნაშვილი მოკლეს და ყარყარაშვილი შემთხვევით გადარჩა. ეს მოხდა მოსკოვში და არა თბილისში. ყარყარაშვილი ახლაც ანგარიშგასაწევი კაცია. რაც საშუალება მქონდა, დავეხმარე. საზღვარგარეთ იმკურნალა, მწყობრშია და ფეხზე დგას. ბედნიერი კაცი ვარ, რომ ამას მოვესწარი.

"მ. კ": სააკაშვილი მუდმივად აცხადებს, რომ ქვეყანა იყო ჩაბნელებული. და, რომ მისი პრეზიდენტობის დროს გადაწყდა ეს პრობლემა ქვეყანაში. არის ეს ისეთი პრიორიტეტი, რომ მუდმივად გვახსენოს პრეზიდენტმა. როდესაც ამხელა გადასახადებს ვიხდით...

ე.შ: სააკაშვილზე რაც შემეძლო, ყველაფერი ვილაპარაკე. ახლა უსაფუძვლოდ მე ვერავის ბრალს ვერ დავდებ. ეს სატრაბახო ნამდვილად არ არის. არც გზების დაგება, არც ის, რომ შუქი არის. მთავრობა იმისთვის ხარ, რომ ხალხს უნდა მისცა გზაც, შუქიც და უნდა მისცე არსებობის საშუალება. ე.ი. სამუშაო ადგილი. ერთ-ერთ გადაცემაში თქვა, აქამდე რას ვაკეთებდი და ვაგებდი გზებსო. შენ მამაცხონებულო მარტო შენ აგებდი გზებს. იმ გაჭირვებულ პერიოდში, როდესაც მე ჩამოვედი საქართველოში, ფოთიდან წითელხიდამდე გავიყვანე გზა. ახლა ვიტრაბახო ამით. ეს იყო ჩემი, როგორც პრეზიდენტის მოვალეობა.

(c) გაზეთი " რეზონანსი "
(c) ქართული პრესის კომპიუტერული არქივი

მოგვწერეთ :opentext@flashmail.com