"რეზონანსი "
# 77
ორშაბათი, 24 მარტი, 2008 წელი

ვინ არის ჯოზეფ ქეი და რა დაიბარა პატარკაციშვილმა "იმედთან" დაკავშირებით - გია ხუხაშვილი: "ჩვენს იდეასა და ბერეზოვსკის შორის არავითარი კავშირი არ არის"

ნინო მიქიაშვილი, ირმა ჩაფიძე

გია ხუხაშვილი აღშფოთებულია იმ ვერსიის გამო, რომელიც შაბათს "რუსთავი-2"-ით გადაიცა, თითქოს მის თანამოაზრეებთან ერთად ფონდის დაარსების იდეას რაღაც კავშირი აქვს ბორის ბერეზოვსკისთან. ხუხაშვილი მოუწოდებს საქართველოს ხელისუფლებას, ადექვატურად მოიქცეს და ტელეკომპანია "იმედისა" და პატარკაციშვილის ოჯახის დევნაზე ხელი აიღოს.

"მთელი კვირა": საიდან წამოვიდა ვერსია თქვენი და ბერეზოვსკის მიერ ფონდის დაფუძნების შესახებ.

გია ხუხაშვილი: ეს ჩემთვისაც ძალიან უცნაურია, რადგან სამწუხაროდ, უნდა ვთქვა, რომ ტელეეთერით გასული ინფორმაცია ასპროცენტიანი ტყუილი იყო. ჩვენ მართლა ვფიქრობთ რაღაც ფონდის დაარსებაზე, მაგრამ ეს არის ჩვენი ინიციატივა, ლაპარაკია ქართულ ფონდებზე, რომლის დამფინანსებლები იქნებიან ქართული საზოგადოების წარმომადგენლები და რომლის მიზანი იქნება დემოკრატიის მხარდაჭერა საქართველოში. ამ იდეაზე ერთად ვმსჯელობთ მე, სოსო ცისკარიშვილი, რატი ამაღლობელი, ზაზა აბაშიძე და ა.შ. ჩვენ ვსაუბრობდით ფონდზე წინა დღეს. "მზემ" ამ ფონდთან დაკავშირებით აიღო ჩემგან კომენტარი. რაღაცას ვაპირებთ, მაგრამ ამ ფონდს ან დავაფუძნებთ, ან არა. რადგან ეს ფინანსურ და ორგანიზაციულ საკითხებს უკავშირდება, მაგრამ ასეთი იდეა არსებობს. ამ ფონდს პოლიტიკასთან არანაირი პირდაპირი კავშირი არ აქვს.

"მ. კ": თქვენ ხომ არ შეხვედრიხართ ამ ბოლო ხანებში ბერეზოვსკის. საერთოდ თუ იცნობთ.

გ. ხ: საერთოდ ვიცნობ. რა თქმა უნდა, შევხვედრივარ, ისევე, როგორც მიხეილ სააკაშვილი და სხვა პირები, რომლებიც ჩემზე ბევრად უფრო ხშირად ხვდებოდნენ მას. ისინი უფრო ელაპარაკებოდნენ პოლიტიკაზე. მე ბერეზოვსკისთან პოლიტიკაზე არ მისაუბრია. ეს შეხვედრა იყო შემთხვევითი ყოველთვის. უბრალოდ, რაღაც სიტუაციაში ისიც ყოფილა.

ძალიან მაინტერესებს, ამ ხელისუფლებას ბერეზოვსკისთან რა პრეტენზია აქვს. ჩვენ ვიცით, რომ ბერეზოვსკისთან პრეტენზია რუსეთის ხელისუფლებას აქვს. თუ ვიღაცა საქართველოში თვლის, რომ პუტინს არ უნდა აწყენინონ, ეს სხვა რამეა.

რაც ყველაზე სიანტერესოა, იმის დასამტკიცებლად, რომ ბერეზოვსკი არის ცუდი კაცი, იმოწმებენ ლუგავოის, რომელიც ბრიტანელი სამართალდამცავების მხრიდან ეჭვმიტანილია ადამიანის მკვლელობაში. ეს ძალიან არასერიოზული და ძალიან სახიფათო ტენდენციაა. მანამდე ბადრი პატარკაციშვილი იყო ცუდი ადამიანი, რადგან ლუგავოი იყო მისი მეგობარი. ეს ყველაფერი უკვე ბრაზილიურ სერიალს ემსგავსება.

"მ. კ": ბერეზოვსკის საქართველოში ფონდის დაფუძნების უფლებას, ალბათ, არ მისცემენ, რადგან მას პატარკაციშვილის დასაფლავებაზე ჩამოსვლის ნებაც კი არ დართეს.

გ. ხ: ეს უკვე მისი პრობლემაა. დასაფლავებაზე ჩამოსვლის საკითხი კი მორალის და ზნეობის სფერო იყო. ერთი დღით არ ჩამოუშვეს ეს ადამიანი. მე ვფიქრობ, რომ ზნეობრივად ეს არ იყო სწორი ნაბიჯი. გამოვიდა, რომ პუტინს არ აწყენინეს. პუტინს, რომელიც განსაკუთრებით ამ ბოლო პერიოდში ძალიან მტრულად არის განწყობილი საქართველოს მიმართ. პუტინის გაგებითაც კი, ერთდღიანი ვიზა რომ მიეცათ ბერეზოვსკისთვის, ეს არ იქნებოდა დიდი სკანდალი. ძალიან სამწუხაროა, რომ ჩვენი ხელისუფლება ასეთ შეცდომებს უშვებს.

კიდევ ერთხელ ვიმეორებ, არანაირი კავშირი ჩვენსა (მარტო ჩემზე არ ვსაუბრობ) და ბერეზოვსკის ფონდს შორის არ არის. ეს ისტორია ძალიან გავს იმას, მე რომ ვთქვა, დღეს რა კარგი ამინდია-მეთქი და ბერეზოვსკიმაც რომ თქვას, დღეს რა კარგი ამინდიაო და ვიღაცამ გააკეთოს აქედან დასკვნა, რომ ჩვენ ერთობლივი გეგმები გვაქვს.

"მ. კ": რას აპირებთ. თუ ესაუბრეთ გადაცემისა და სიუჟეტის ავტორებს.

გ. ხ: დიახ, ვესაუბრე დათო კიკალიშვილსა და ირმა ნადირაშვილს. ავუხსენი სიტუაცია. მე მაინც მინდა, კოლეგიალობა შევინარჩუნო და განწყობილი ვარ, რომ ეს ჩაითვალოს შეცდომად. მე ამაზე დიდი სკანდალის ატეხვას და ჩივილს არ ვაპირებ. არ მინდა, ვიღაცამ ჩათვალოს, რომ თავს ვიმართლებ. არც მე და არც ჩემს თანამოაზრეებს არაფერი გვაქვს თავის სამართლებელი ბერეზოვსკისთან დაკავშირებით. თუ რამე პრეტენზიები აქვს ხელსიუფლებას ბერეზოვსკისთან, ეს თვითონ არკვიონ ერთმანეთში. თუ მისგან ახალი მტრის ხატის შექმნას აპირებენ პიარ-ტექნოლოგიებით, ეს მათი საქმეა. მე არანაირი კავშირი ამ შემთხვევაში არც ხელისუფლებასთან და არც ბერეზოვსკისთან არა მაქვს. ეს იყო სტერილურად არასწორი ინფორმაცია.

იმედი მაქვს დღეს "რუსთავი 2"-ში გაკეთდება უარყოფა. შეცდომა ყველას მოსდის და განწყობილი ვარ ისე, რომ ეს ჩავთვალო შეცდომად, თუ ამის უარყოფა მოხდება.

"მ. კ": რა ინფორმაცია გაქვთ "იმედთან" დაკავშირებით.

გ. ხ: ვიცით, რომ ვინმე ჯოზეფ კეი ამტკიცებს, რომ "იმედი" მან იყიდა, რაც არის სრული აბსურდი. რამდენადაც მე ვიცი, უკვე საკმაოდ კომპეტენტური ორგანოები ევროპაში დაინტერესებულები არიან და შესაბამისი ქმედებებიც არის ოჯახის მხრიდან.

"მ. კ": თქვენ ფიქრობთ, რომ ხელისუფლების დახმარებით გადაიფორმა ეს წილი ჯოზეფ კეიმ.

გ. ხ: როდესაც წილის გადაფორმება ხდება დილის შვიდ საათზე, ყადაღა იხსნება ერთი დღით და მერე ისევ ყადაღა იდება ქონებაზე, ეს, რა თქმა უნდა, სერიოზულ, საფუძველიან ეჭვს აჩენს. ეს იურიდიული პროცედურები საქართველოში განხორციელდა ისეთ დროს, როდესაც, დამერწმუნეთ, ნორმალურ მოსამართლეებს სძინავთ, ნოტარიუსებსაც სძინავთ. თან, რაც მთავარია, ქონებას ყადაღა ედო და ყადაღა იყო მოხსნილი ერთი საათით.

მოგეხსენებათ, ასეთი რაღაც ამ ქვეყნაში ყოველ შემთხვევაში არ ხდება. აქედან გამომდინარე, ეს საფუძვლიან ეჭვს აჩენს, რომ ეს ყველაფერი მოხდა ხელისუფლების დახმარებით. რაც მთავარია, თაღლითობის ნიშნებია ამ ქმედებაში.

"მ. კ": თქვენ თუ იცნობთ ამ პიროვნებას.

გ. ხ: მე არ ვიცნობ პირადად მას, მაგრამ ვიცი, რომ არა მარტო საქართველოში, სხვა ქვეყნებშიც ეს პიროვნება შეეცადა, პატარკაციშვილის ქონებას დაპატრონებოდა. აფრიალებდა რაღაც ფარატინა ქაღალდს, თითქოს მას ჰქონდა მინდობილობა ბადრისგან. არადა, ჩვენ უნდა ვიცოდეთ, რომ ყველა მინდობილობა ადამიანის გარდაცვალების შემდეგ უქმდება.

ამ მინდობილობის ტექსტში, სამწუხაროდ, ეწერა, რომ გარდაცვალების შემდეგაც მოქმედებს. ძალიან დიდი ალბათობით, ეს არის ფალსიფიცირებული დოკუმენტები. ასეთი რაღაცები არ ხდება ბუნებაში და ძალიან ვწუხვარ, რომ ხელისუფლება ამას უწოდებს ოჯახურ კონფლიქტს. ბადრის ჰყავდა მრავალრიცხოვანი ოჯახი: დედა, დები, მეუღლე, შვილები, სიძეები არიან ერთ მხარეს და დეიდის, უფრო სწორედ, გერი დეიდის შვილი, ანუ, ყვავი ჩხიკვის მამიდა არის მეორე მხარეს. ამას ხელისუფლება უწოდებს ოჯახურ კონფლიქტს, რაც დამეთანხმებით, სრული აბსურდია.

ნორმალური ქვეყანაში არსებულ ვითარებაში, შესაბამისი მიმართვის საფუძველზე უნდა აღიძრას სისხლის სამართლის საქმე თაღლითობაზე და ჯოზეფ ქეი უნდა იქნას დაპატიმრებული. მისი ადვოკატი, რომელიც აქტიურად იყო ჩართული ამ პროცესებში, პატარკაციშვილების ოჯახის მიმართვის საფუძველზე, უკვე დაპატიმრებულია ბელორუსიაში თაღლითობის მუხლით და პრინციპში, ჯოზეფ ქეი იყო აქ წამყვანი ფიგურა და არა ადვოკატი. ის შეეცადა ოჯახის გაძარცვას. აქ არ არის მხოლოდ სამართლებრივი საკითხი. აქ არის ზნეობის, მორალის საკითხი, როდესაც გარდაცვლილის ძარცვა მიმდინარეობს. არ ვარ განწყობილი, ვიფიქრო, რომ ეს ყველაფერი ხელისუფლების მიერაა ორგანიზებული, გამომდინარე იქიდან, რომ ქეი მოქმედებს არა მხოლოდ საქართველოში. აქედან გამომდინარე, ჩნდება ძალიან საფუძვლიანი ეჭვი, რომ ეს არის რაღაც თაღლითური ტრანსნაციონალური ოპერაცია, რომელშიც ჩართულები არიან რუსეთის სპეცსამსახურები და კრიმინალური სამყარო და ისინი ან ცალ-ცალკე, ან ორივე ერთად მოქმედებენ პატარკაციშვილის ქონების დაუფლების მიზნით. იოსკა კაკიაშვილზე ძალიან ბევრი რამეა ცნობილი და, როგორც ჩანს, ამ ყველაფერს მალე გაიგებს საზოგადოება. მისი კავშირები კრიმინალურ სამყაროსთან, დაპატიმრება ფეესბე-ს მიერ. მერე ფეესბე-დან ძალიან უცნაური გამოშვება მისი და ა.შ. ეს მოხდა ოთხმოცდაათიანი წლების დასაწყისში. ანუ, ჩვენ გვაქვს ასეთ პიროვნებასთან საქმე...

"მ. კ": თქვენ თუ გქონიათ ბატონ ბადრი პატარკაციშვილთან საუბარი ამ პიროვნების შესახებ.

გ. ხ: კი, მაგრამ ძალიან მოკლედ. იოსკა კაკიაშვილი არის რუსთავის მეტალურგიული ქარხნის მფლობელი. ძალიან ვწუხვარ, რომ ასეთი რეპუტაციის სტრატეგიული პარტნიორები ჰყავს ჩვენს ქვეყანას. პატარკაციშვილმა ცალსახად მითხრა, რომ ამ ადამიანთან მას აქვს ურთიერთობა, როგორც შორეულ ნათესავთანო. მან მითხრა, ჩემს გამო იმასაც შეექმნა პრობლემები, არადა, მის ბიზნესს ჩემს ბიზნესთან არანაირი კავშირი არ აქვსო. მიუხედავად ამისა, მე არ უარვყოფ, რომ რაღაც ურთიერთობა ჰქონდა პატარკაციშვილთან, მაგრამ, დამერწმუნებით, რომ იოსკა კაკიაშვილს თავის ქონებას ასეთი მრავალრიცხოვანი ოჯახის უფროსი გარდაცვალების შემდეგ არ ჩააბარებდა. არ მინდა, ძალიან შორს წავიდე, თორემ შეიძლება, სხვა ეჭვებიც გაჩნდეს პატარკაციშვილის გარდაცვალებასთან დაკავშირებით - თითქოს ყველაფერი დაგეგმილად ვითარდებოდა.

იოსკა კაკიაშვილის ქმედებები აძლიერებს ეჭვს, რომ ძალიან ცუდი რაღაცა ხდება, გარდა იმისა, რაც ხდება "იმედთან" დაკავშირებით. რაც შეეხება "იმედს" და აქციას, ჩვენ უნდა გვესმოდეს, ზეპირი ანდერძით, "იმედის" საკითხი არ არის ოჯახის ქონების საკითხი. პატარკაციშვილმა თქვა და ოჯახმაც გაიმეორა, რომ "იმედი" არის ქართველი ხალხის მონაპოვარი. თუ დღეს ვინმე ამ აქციაზე მივა, ის არ მიდის მხოლოდ პატარკაციშვილის ოჯახის დასაცავად. ის მიდის საკუთარი ქონების, საკუთარი მონაპოვარის დასაცავად. რაც შეეხება ბატონ იოსკას, მისი საკითხი, ალბათ, გაირკვევა. მე მოვუწოდებ ხელისუფლებას, ახლა მაინც დაიცვას ეს ოჯახი თაღლითებისგან.

(c) გაზეთი " რეზონანსი "
(c) ქართული პრესის კომპიუტერული არქივი

მოგვწერეთ :opentext@flashmail.com