"სარბიელი"
# 82
შაბათი, 12 აპრილი, 2008 წელი

სანამ ოპა, მანამ ევროპა: ფედერაცია მოლაპარაკებებს ოთხ მწვრთნელთან იწყებს

ილია ნანობაშვილი

ვინ იქნება საქართველოს ნაკრების მწვრთნელი - ჯერ არავინ იცის და 100 პროცენტით შეგვიძლია

ვთქვათ, რომ გამოკვეთილი კანდიდატი არ არსებობს. ის კი ნაღდია, რომ საქართველოს ფეხბურთის ფედერაციის ფავორიტთა შორის უპირველესი ჰოლანდიელი ლუის ვან გაალია: ყველაზე სასურველი, მაგრამ ყველაზე ძნელი და, შესაბამისად, ძვირი ვარიანტიც...

გუშინ ფედერაციის გენმდივან

უჩა უგულავას დავუკავშირდით, ვისი თქმითაც, ერთ კვირაში ყველა გაიგებს საბოლოო კანდიდატთა სიას, მანამდე კი ვიზიტი ევროპაში...

- ორშაბათს ფედერაციის ხელმძღვანელობა ევროპაში გაემგზავრება და რამდენიმე მწვრთნელთან მოლაპარაკებას უშუალოდ დაიწყებ.

- კერძოდ, რომელ ქვეყანაში.

- ჯერ დაზუსტებით ვერ გეტყვით. სავარაუდოდ, ნოდარ ახალკაცი, რევაზ არველაძე და გოგი ქავთარაძე გაემგზავრებიან.

- რამდენ მწვრთნელთან აპირებენ მოლაპარაკებას.

- ოთხთან. არ არის გამორიცხული, იქ კიდევ გამოჩნდეს ახალი ვარიანტები.

- ლუის ვან გაალი თუ არის მათ შორის.

- ეგ უკვე დაკონკრეტება გამოვა, რასაც ამ ეტაპზე ვერიდებით, რადგან შეიძლება, მოლაპარაკების პროცესს ავნოს. გვერწმუნეთ, ჯერ თითქმის არაფერია გარკვეული და გამოკვეთილი ფიგურა არ ჩანს.

- უკვე მერამდენედ ვკითხულობთ, მაგრამ მაინც: ქართველი მწვრთნელის დანიშვნა გამორიცხულია.

- არა, ჯერ ასე ხელაღებით ვერ ვიტყვით, თუმცა უცხოელის მეტი შანსია.

- თანაშემწედ ქართველი უნდა იყოს - ეს აუცილებელი პირობაა.

- პუნქტში ასე გვიწერია და, სავარაუდოდ, ასეც იქნება. ჩვენი მოთხოვნები არ შეცვლილა: მწვრთნელმა წელიწადის მინიმუმ ნახევარი საქართველოში უნდა გაატაროს, მჭიდრო კონტაქტები უნდა ჰქონდეს ასაკობრივი ნაკრებების მწვრთნელებთან, რაც შეიძლება, ბოლომდე გაეცნოს ქართულ ფეხბურთს, მის ყველა თავისებურებას, თუმც ერთიცაა: დავუშვათ, მარჩელო ლიპი ან ჟოზე მაურინიუ რომ ჩამოვიყვანოთ, მას ვერ მოვთხოვთ, მაინცდამაინც ქართველი ასისტენტი უნდა გყავდესო.

- ლიპი ადრეც ახსენეთ და საინტერესოა, გაქვთ მისი ჩამოყვანის იმედი.

- იმედი გადაჭარბებული ნათქვამი გამოვა. არარეალური არ არის, მაგრამ ძალიან მეპარება ეჭვი, ლიპიმ საქართველოში იცხოვროს. ის აქამდე სულ ტოპ-გუნდებში მუშაობდა და...

- ამასწინათ თქვით, ესტონეთთან და პორტუგალიასთან მატჩების შემდეგ, ანუ ივნისის დასაწყისში, შესაძლოა, ნაკრებმა კიდევ ერთი თამაში გამართოსო...

- შოტლანდიამ უარი განაცხადა, ახლა კი კიდევ ორ ევროპულ და ერთ სამხრეთამერიკულ ნაკრებთან თამაშის ვარიანტები გვაქვს.

(c) გაზეთი "სარბიელი "
(c) ქართული პრესის კომპიუტერული არქივი

2008 წელი

მოგვწერეთ :opentext@flashmail.com