მთავარი
ჩვენს შესახებ
რჩეული
გალერეა
სტატიების RSS
 
ლელო
2010-06-15
გია გეგუჩაძე: დაცვა და თავდასხმა უნდა გავაძლიეროთ
სეზონის შეფასება დეტალებში, ამჯერად მთავარი მწვრთნელის მხრიდან. აზრი ახალწვეულებზე და სამომავლო გეგმები, `დინამოს~ ბრალდება და მიზანი ევროტურნირებზე - `ზესტაფონის~ თავკაც გია გეგუჩაძეს ამ და სხვა საინტერესო თემებზე გავესაუბრეთ.

- საუბარი გასული სეზონის შეფასებით დავიწყოთ. კმაყოფილი ხართ?
- კმაყოფილი ვერ ვიქნები, რადგან მეტის მიღწევა გვსურდა და არ გამოგვივიდა. ასე რომ, ჩემი გუნდის ასპარეზობას ჩემპიონატსა და თასის გათამაშებაზე დადებითად ვერ შევაფასებ.
- მაინც, რატომ ვერ განახორციელეთ მიზანი - რა ფაქტორებს დაასახელებდით, ტრავმებს, მსაჯობას, საქართველოში მოედნების ცუდ მდგომარეობას...
- მიზეზი არაერთია, მაგრამ მიზეზებზე ყურადღების გადატანა არ მჩვევია. ამაზე გუნდთან და ჩემს შტაბთანაც მქონდა საუბარი და ყველას ვუთხარი, მიზეზი ჩვენს თავში უნდა ვეძებოთ-მეთქი. ყველა მიზეზის დაძლევა და უკეთესი შედეგის ჩვენება შეგვეძლო, უბრალოდ, ხასიათის მეტი სიმტკიცე გვჭირდება. ამასთან, ყველა თამაშზე მეტი მოტივაციაა საჭირო, ამის გამო ბევრი დაუგეგმავი ქულა დავკარგეთ. ყველამ კარგად ვიცით, რომ ჩვენში მოედნების მდგომარეობა დამაკმაყოფილებელი არ არის. ამ ყველაფრის მიუხედავად, ჩანაფიქრის განუხორციელებლობის მიზეზები საკუთარ თავში უნდა ვეძებოთ.
- გასული ჩემპიონატისთვის გადამწყვეტი უმთავრესად `ოლიმპთან~ თქვენი გუნდის საშინაო მატჩი იყო, რომელიც მომხდარი ინციდენტის გამო არბიტრმა შეწყვიტა და შეხვედრა არ დასრულებულა. მაინც რა მოხდებოდა, იმ მატჩის არბიტრ გიორგი ვადაჭკორიას შეხვედრა რომ ჩაემთავრებინა?
- ვფიქრობ, თამაშის გაგრძელება არბიტრის მხრიდან სწორი გადაწყვეტილება იქნებოდა.
- ამით თუ შეიცვლებოდა სატურნირო ცხრილი? ის მატჩი რომ მოგეგოთ, მაშინ რა იქნებოდა?
- შეიძლება ფრე ყოფილიყო, შეიძლება მოგვეგო კიდეც, გადაჭრით ძნელია რამის თქმა... ის ინციდენტი რომ არ მომხდარიყო, სამი საკვანძო ფეხბურთელი დისკვალიფიკაციის გამო არ გამოგვაკლდებოდა. ამ მოთამაშეების დისკვალიფიკაციით სერიოზული დანაკლისი განვიცადეთ.
- რომელი მატჩები დაგამახსოვრდათ კარგად და ცუდად. ვგულისხმობ როგორც შედეგს, ასევე გამართულ, სწორ თამაშს...
- ჩვენს თამაშში არაერთი კარგი და ცუდი მომენტები ყოფილა. იყო მატჩები, რომელშიც თამაშის ხარისხი და შესრულება ძალიან მაღალი იყო, მაგრამ ვერ მოვიგეთ. უამრავი საგოლე მომენტი შევქმენით, მაგრამ გოლი ვერ გავიტანეთ. ამის მაგალითად `ლოკომოტივთან~ ჩატარებული მატჩები შემიძლია დავასახელო. ზოგ მატჩში ცუდად ვითამაშეთ. ასეთთა შორის უმთავრესად `ვიტ ჯორჯიასთან~ თასის საპასუხო შეხვედრას დავასახელებდი.
- გასულ სეზონში დუბლშემადგენლობის რამდენიმე ფეხბურთელმა არაერთი მატჩი ჩაატარა მთავარ გუნდში. მათ გარჯას როგორ შეაფასებდით?
- ჩვენი კლუბის პოლიტიკიდან გამომდინარე, ახალგაზრდებს ყოველთვის მიეცემათ მთავარ გუნდში თავის გამოჩენის შესაძლებლობა. თუმცა ეს მათ სწორად უნდა აღიქვან და გაიგონ. ეს მათთვის სტიმული და ავანსად გაცემული იმედია, რომელიც დიდი შრომით უნდა გაამართლონ. ისინი ახლა ყალიბდებიან, უკეთეს დონეზე შეუძლიათ თამაში და მათგან მომავალში მეტს ველით.
- განვლილ ჩემპიონატში მსაჯობას როგორ შეაფასებდით?
- მომიტევეთ, მაგრამ მსაჯობაზე არ მიყვარს ლაპარაკი.
- დასრულდა სეზონი და 4 ფეხბურთელი გამოგაკლდათ, კორღალიძე, გამეზარდაშვილი, მჭედლიშვილი და კაჭკაჭიშვილი. რამდენადაც მახსოვს, ყველა მათგანის საკონტრაქტო ვადა არ ამოწურულა...
- ორმხრივი შეთანხმების საფუძველზე გავწყვიტეთ მათთან კონტრაქტები.
- ორი ფეხბურთელი დაიმატეთ - ნახევარმცველი შოთა ბაბუნაშვილი და თავდამსხმელი გოგი ფიფია. ახალწვეულებზე რას გვეტყოდით?
- მათ სრულ ნდობას ვუცხადებთ და საკმაოდ დიდ იმედებს ვამყარებთ. ბაბუნაშვილსა და ფიფიას კარგად ვიცნობ. მათ უკეთეს დონეზე შეუძლიათ თამაში, ვიდრე ეს აქამდე იყო. თუმცა აქვე ვიტყოდი იმასაც, რომ ჩვენს გუნდში დიდი კონკურენციაა და სასტარტო შემადგენლობაში ადგილის მოსაპოვებლად მათაც ბრძოლა მოუწევთ. ერთი სიტყვით, კარგი ფეხბურთელები დავიმატეთ, როგორც მოთამაშეები, ასევე პიროვნულადაც, ორივე მტკიცე ხასიათის მოთამაშეა და ამ კონკურენციაში ბოლომდე იბრძოლებენ.
- ოთხი ფეხბურთელი გამოგაკლდათ და ორი დაიმატეთ. ალბათ ამით არ დასრულებულა `ზესტაფონის~ გაძლიერება. კიდევ რა პოზიციაზე აპირებთ მოთამაშეების დამატებას?
- დიახ, ამ ორი ფეხბურთელის შემატებით გუნდის გაძლიერება არ დასრულებულა. ვთვლი, რომ ამ ეტაპზე, ჩვენი გუნდის შუა ხაზი საკმაოდ ძლიერია. ნახევარდაცვაში თითო პოზიციაზე ორი ფეხბურთელი გვყავს და ყველა მათგანს სრულფასოვნად შეუძლია მეორის შეცვლა. ჩემი აზრით, თავდასხმისა და დაცვის ხაზში გაძლერება გვჭირდება.
- ალბათ უკვე შეიგულეთ ფეხბურთელები. ავსტრიაში, მოსამზადებელი შეკრების განმავლობაში ახალი მოთამაშეები ხომ არ შემოგიერთდებიან?
- შეგულებული არავინ გვყავს, ძიების პროცესში ვართ. არც იმას გამოვრიცხავ, რომ ავსტრიაში აგენტებმა ფეხბურთელები შემოგვთავაზონ. სასურველია, რომ ქართველი ფეხბურთელი დავიმატოთ, თუმცა უცხოელსაც არ გამოვრიცხავ. იმასაც გეტყვით, რომ ჯერჯერობით არავისთან ვაწარმოებთ მოლაპარაკებას.
- გავრცელებული ხმების მიხედვით, `ზესტაფონში~ მცველი დავით გიგაური და ნახევარმცველი ზვიად ჩხეტიანი შეიძლება გამოჩნდნენ...
- გიგაურზე არ გვიფიქრია, ზვიად ჩხეტიანი რამდენიმე დღის განმავლობაში ვარჯიშობდა ჩვენს გუნდში, მაგრამ ამ ეტაპზე უარი ვთქვით მის დამატებაზე.
- ავსტრიაში 2 კვირით იდეალურ პირობებში მომზადება და 4 საკონტროლო მატჩი ძლიერ სპარინგებთან. წესით, `ზესტაფონს~ ეს მოსამზადებელი შეკრება დიდად უნდა წაადგეს...
- გეთანხმებით, კარგი პირობები, ძლიერი სპარინგები... შევეცდებით, ეს პერიოდი მაქსიმალურად გამოვიყენოთ. ამხანაგური მატჩებისთვის ძლიერი სპარინგები შეგნებულად ავირჩიეთ, რადგან ასეთ მეტოქესთან ნათლად ჩანს გუნდის სუსტი და ძლიერი მხარეები.
- შარშან `ზესტაფონს~ რამდენიმე წამი დააკლდა შვედური ბარიერის გადასალახავად. წელს ევროპის ლიგაზე პირველი მატჩი 1-ელ ივლისს გიწევთ. საკმარისია დრო სათანადოდ მოსამზადებლად?
- დრო საკმარისია, მაგრამ ვწუხვარ, რომ ფეხბურთელებს მეტი დასვენების საშუალება არ ჰქონდათ. ჩვენს ფეხბურთელებს ეროვნულ და ახალგაზრდულ ნაკრებებში მოუწიათ თამაშმა და სხვებთან შედარებით, დასვენებისთვის დრო ნაკლები დარჩათ. შესაბამისად, ასეთებს ინდივიდუალურად მივუდექით და შესაბამისი პროგრამით ვავარჯიშებთ.
ერთი სიტყვით, მოსამზადებლად დრო საკმარისია, მაგრამ ევროტურნირზე წარმატებით ასპარეზობისთვის, წილისყრაზეც ბევრი რამ იქნება დამოკიდებული. ხშირად ვიხსენებთ `ჰელსინკბორგთან~ მატჩებს და მე მგონი ამან ნეგატიურადაც კი იმოქმედა ჩვენს ფეხბურთელებზე. მართალია, შვედებთან კარგად ჩატარებული ამ მატჩების შემდეგ, ჩვენმა ფეხბურთელებმა უფრო ირწმუნეს საკუთარი ძალების. თუმცა ისიც უნდა ითქვას, რომ მოთამაშეებს დიდხანს მოუწიათ ამ შთაბეჭდილებების ქვეშ ყოფნამ. ალბათ ამით აიხსნება, ცხრილის ქვედა ნაწილში მყოფ გუნდებთან მატჩებში დაკარგული ქულები.
- დაბოლოს, `დინამოსგან~ წამოსულ ბრალდებაზე მინდა გკითხოთ. მაინც რა ინფორმაციას გაწვდიდათ ფიზმომზადების მწვრთნელი ივო კატუშიჩი მეტოქე ბანაკიდან?
- კატუშიჩს რა ინფორმაცია უნდა მოეწოდებინა, უმისოდაც კარგად ვიცნობ `დინამოს~ და ვიცი ამ გუნდის შესაძლებლობები... როგორც ფეხბურთელს უმთავრდება კონტრაქტი კლუბთან და მასთან შეიძლება მოლაპარაკებების დაწყება, ვფიქრობ, ისევე შეიძლება მწვრთნელთანაც. მართალი გითხრათ, ამ თემაზე არ მინდა საუბარი. კატუშიჩს დაუსრულდა საკონტრაქტო ვადა და ახალ კლუბთან გააფორმა კონტრაქტი. ეს იყო და ეს.






ავტორი:  დავით ცაბაძე


კალენდარი
ოქტომბერი  2010
ორშ   
სამ   
ოთხ   
ხუთ   
პარ   
შაბ   
კვ   
 
 
 
 
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
 
 
გაზეთები
ახალი თაობა
11x11
იმედი
ქიზიყი
შირაქი
სტუდენტური ნიუს
სარბიელი
თავისუფალი გაზეთი +
საქართველოს რესპუბლიკა
24 საათი
21-ს ქვევით
24 საათი - ბიზნესი
ლელო
24 საათი - დედაქალაქი
7 დღე
ალიონი
ახალი ეპოქა
ახალი 7 დღე
ახალგაზრდა ივერიელი
არილი
ახალი საქართველო
ალტერნატივა
აფხაზეთის ხმა
აქცენტი
ბანკი პლუს
განახლებული ივერია
გურია - news
დიასპორა
დილის გაზეთი
დრო
დრონი
ეკო-დაიჯესტი
ვეჩერნი ტბილისი
თანამემამულე
თბილისი
თბილისის სიახლენი
ივერია - ექსპრესი
იმერეთის მოამბე
იბერია - სპექტრი
კახეთის კარიბჭე
კახეთის ხმა
კავკასიონი
კვირას
კვირის პალიტრა
კვირის პანორამა
ლანჩხუთი პლუს
ლიტერატურული საქართველო
მეანაბრე
მენორა
მეოცე საუკუნე
მერიდიანი 44
მიწის მესაკუთრე
მწვანეყვავილა
ობშეკავკაზსკაია გაზეტა
ოლიმპი
რეზიუმე
საბანკო ბიულეტენი
საგურამო
საქართველო
საქართველოს ებრაელობა
სპორტის სიახლენი
ხალხის გაზეთი
ხვალინდელი დღე
ქართული
ქომაგი
ქუჯი
ცოცხალი
ჯორჯიან თაიმსი
ჯორჯია თუდეი
ჩვენი მწერლობა
ჩოხატაურის მაცნე
ღია ბოქლომი
ცისკარი
შანსი
2000
რეზონანსი
იმედი
საერთო გაზეთი
ახალი ვერსია
ლიტერატურული გაზეთი
Created by EVENS   2010

მთავარი
ჩვენს შესახებ
რჩეული
კონტაქტი